DILI, 12 fevereiru 2024 (TATOLI)—Komisaun Nasionál Eleisaun (CNE, sigla portugés) planeia ona iha tinan ne’e sei implementa sistema biométriku hodi evita fraude eleitorál no garante kartaun eleitorál eletróniku seguru.
Prezidente CNE, José Agostinho da Costa Belo, hateten, sistema ne’e atu kontrola ema-nia identidade kompletu no evita dupla, nune’e daudaun ekipa téknika Sekretariadu Tékniku Administrasaun Eleitorál (STAE) no CNE halo hela diskusaun atu introdús sistema ne’e.
“Data fiksu atu estabelese seidauk hatene maibé importante ita serbisu hamutuk ho Ministériu Administrasaun Estatál (MAE) sei estabelese iha tinan ne’e, tanba sistema ne’e sei garante liután baze dadus atu kontrolu ema-nia identidade pesoál,” Prezidente CNE, informa hafoin halo abertura workshop ho tema ‘Konsolida Programa no Polítika Dezenvolvimentu CNE 2024-2026, iha salaun Laine-Lariguto CNE, Caicoli, segunda ne’e.
Sistema biométriku hanesan planu prioridade ida hosi CNE ba preparasaun eleisaun sira ne’ebé sei akontese iha futuru mai.
Notísia relevante : Introdús sistema biométriku, STAE sei konsulta ho TIC-Timor-Leste
Bainhira sistema ne’e estabelesidu, sei fasilita ema hotu la’ós de’it ba identidade pesoál maibé fasilita mós públiku tomak ba eleisaun iha futuru tanba bainhira sistema rejistu la’o di’ak ona, iha eleisaun la presiza uza tinta tanba sistema kapta hela no halo manipulasaun ladi’ak.
“Rai barak agora uza hela sistema ne’e. Sistema ida-ne’e bele kontrola ema-nia identidade labele dupla no ida-ne’e mós bele ajuda futuru rejistu Partidu Polítiku sira. Bainhira sistema ne’e estabelese di’ak ona, sekretu intelijénsia nian mós bele asesu hotu atubele identifika ema-nia identidade loloos,” nia akresenta.
Nia dehan, Timor-Leste presiza sistema ne’e tanba mundu daudaun iha mudansa, tanba ne’e tenke la’o tuir evolusaun.
Jornalista : Arminda Fonseca
Editora : Julia Chatarina
