DILI, 12 fevereiru 2024 (TATOLI)—Governu halo ona preparasaun lubuk ida atu simu vizita Santo Padre Francisco, iha fulan-agostu tinan ne’e, nune’e planeia ona atu halo reabilitasaun uluk salaun Very Important Person (VIP) Aeroportu Internasionál Prezidente Nicolau Lobato, Comoro.
“Ekipa delegasaun ida mai hosi Vatikanu hala’o tiha ona, vizita aeroportu hodi haree kondisaun iha ne’ebá. Ne’ebé iha ona desizaun ida katak sei halo reabilitasaun kiik iha duni salaun VIP Aeroportu nian, nomós haree pista ne’ebé iha posibilidade karik atu tau iluminasaun (ahi),” Ministru Transporte no Komunikasaun, Miguel Marques Manetelu, hateten ba jornalista sira iha salaun Ministériu Negósiu Estranjeiru no Kooperasaun (MNEK), iha Praia dos Coqueiros, segunda ne’e.
Notísia relevante : PM Xanana garante seguransa ba vizita Amu Papa Francisco mai Timor-Leste
Ministru dehan, iha posibilidade rua, katak reabilitasaun ne’e bele adjudika direta ba kompañia ka bele mós liuhosi prosesu normál.
“La’ós atu haluan pista aeroportu maibé monta de’it, karik aviaun semo kalan, ne’ebé buat kiik. Dadaun Ajénsia Dezenvolvimentu Nasionál (ADN) no ministériu halo hela serbisu para haree ita-nia nesesidade ne’e iha ne’ebé, sei haree ba tempu katak loke konkursu ka oinsá tanba adjudikasaun ne’e mós modalidade ida hosi prosesu aprovizionamentu ne’e,” nia akresenta.
Governante ne’e adianta sei haree mós ba kondisaun rede internet tanba iha jornalista kuaze na’in-90 mak sei halo kobertura kona-ba vizita ne’e.
“Sira ne’e hotu hakarak halo transmisaun direta, maibé bazeia ba ita-nia realidade ne’ebé mak iha ami bele asegura maibé hanesan ha’u hateten bebeik buat ida sistema ne’e, natureza ne’e ita la garante, derrepente mosu dezastre naturál ruma ho udan-boot, maibé fulan-agostu ne’e bailoro ona, ne’ebé ami asegura ida-ne’e,” Ministru tenik.
Jornalista : Antónia Gusmão
Editora : Julia Chatarina
