iklan

EKONOMIA, HEADLINE, MANATUTO

Komunidade iha suku Aubeon la halo natar tanba irrigasaun la funsiona

Komunidade iha suku Aubeon la halo natar tanba irrigasaun la funsiona

Imajen/ Hortencio Sanchez

DILI, 12 fevereiru 2024 (TATOLI)— Xefe Suku Aubeon, Domingos Gonzaga, informa durante tinan tolu ona  komunidade iha suku Aubeon, Postu Administrativu Barique, Munisípiu Manatuto labele halo natár tanba irrigasaun aat ne’ebé kauza hosi dezastre naturál.

“Durante tinan tolu ona mak komunidade sira iha ne’e labele halo natar tanba irrigasaun barak mak aat kauza hosi dezastre naturál ne’ebé akontese iha tinan 2020 to’o 2021,” hatete Xefe Suku ne’e ba jornalista sira iha Aubeon, segunda ne’e.

Aleinde irrigasaun ne’ebé hetan estragu no tratór hirak ne’ebé iha Governasaun Aliansa Maioria Parlamentár distribui kuaze aat hotu ona no labele atu fila-rai.

“Problema ida mak tratór sira ne’ebé uluk Governu sira fahe ne’e aat hotu ona, entaun komunidade sira labele halo servisu,” nia katak.

Iha fatin hanesan, komunidade Aubeon, Mario Soares, hatete, natar barak mak abandona tanba irrigasaun ladi’ak, nune’e husu ba Governu atu tau prioridade hodi ajuda komunidade sira hadi’a fila-fali irigasaun.

“Ami nia natar kuaze etare 50 liu mak abandoba tanba dezastre naturál ne’ebé akontese iha tinan 2021. La’ós ne’e de’it tratór ne’ebé uluk ami simu aat hotu ona, sé bele Governu bele hola foun fó fali ami nune’e ami bele kontinua fila rai halo natar, iha foho ne’e ami nia moris mak nune’e ona,” katak Mario.

Hatan ba kestaun ne’e, Vise Primeiru Ministru, Mariano Assanami Sabino, hatete, sei  koordenasaun ho Ministériu Agrikultura atubele haree ba problema ne’ebé agrikultór sira hasoru iha Natarbora.

“Governu sei haree atu hadi’a, ami sei koordena ho Ministru Agrikultura atu haree ba tratór sira ne’ebé avaria no oinsa halo jestaun ne’ebé di’ak atu hadi’a fali irigasaun sira ne’ebé aat, atu nune’e fó biban ba agrikultór sira kontinua halo produsaun ba hare tanba Natarbora ne’e rai bokur,” Governante ne’e garante.

Tuir nia, Natarbora la’ós de’it halo produsaun ba haree, maibé iha mós produtu seluk ne’ebé presiza dezenvolve hanesan ai-fuan, modo, batar no seluk tan.

Notísia relevante:MAPPF tau prioridade konstrusaun irrigasaun boot tolu iha tinan 2024

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!