MANATUTO, 13 favereiru 2024 (TATOLI)– Komunidade iha Suku Aubeon, Postu Administrativu Barique, Munisípiu Manatuto, husu ba operadór telekomunikasaun tolu hanesan Timor-Telecom, Telemor no Telekomcel atubele harii torre iha suku refere hodi bele rezolve rede internet tanba susar tebes atu asesu informasaun sira.
“Ami iha Aubeon ne’e liña ínternet susar loos, Telkomsel ne’e laiha totál, Timor Telecom no Telemor rede iha oituan, maibé mosu-lakon, nune’e husu atu operadór telekomunikasaun atubele rezolve kestaun ne’e,” hatete komunidade Jito da Costa, ba Agência TATOLI iha Aubeon foin lalais ne’e.
Notísia Relevante: MTK orienta ANC koordena ho operadór telekomunikasaun hadi’ak rede ínternet
Programa Governu nian kapas tebes atu hala’o dezenvolvimentu iha área rurál, maibé atu servisu sira la’o di’ak ba oin tenke hadi’a mós lina internet iha área rurál sira.
“Ita atu hala’o dezenvolvimentu iha área rurál hanesan iha suku Aubeon ne’e, liña internet de’it susar la halimar, sé bele Governu tau mós atensaun ba ida ne’e hodi fó hanoin ba operadór telekomunikasaun sira,” nia sujere.
Iha biban hanesan, Mateus da Silva nu’udar mós komunidade Aubeon reforsa tan katak, dalabarak sira susar atu asesu ba informasaun sira iha média sosiál tanba laiha liña internet ne’ebé di’ak.
“Ami iha ne’e susar atu asesu ba informasaun sira iha média sosiál, liña internet la di’ak. Nune’e husu Governu atu fó hanoin ba operadór telekomunikasaun hodi rezolve situasaun hirak ne’e”, katak nian.
Hatan ba kestaun ne’e, Vise Primeiru Ministru, Mariano Assanami Sabino, hateten sei koordena ho operadór telekomunikasaun sira atu estabelese sira nia torre iha fatin sira ne’ebé susar asesu ba liña internet.
“Kona-ba lina internet iha ne’e susar duni, ita sei haree no ko’alia ho operadór sira, ko’alia ho telemor atu monta sira nia torre atu bele fornese liña internet di’ak,” Governante ne’e afirma.
Nia dehan, importante duni atu rezolve liña internet iha área rurál tanba servisu hotu la’o presiza mós lina internet ne’ebé di’ak.
Notísia relevante: Komisaun E iha PN sei bolu MTK esplika problema internet lentu
Jornalista: Hortencio Sanchez
Editór : Florencio Miranda Ximenes
