DILI, 13 fevereiru 2024 (TATOLI)—Governu liuhosi reuniaun Konsellu Ministru (KM) estraordinária, tersa ne’e, aprova projetu rezolusaun Governu, ne’ebé aprezenta hosi Ministra Saúde, Élia dos Reis, kona-ba Planu Integradu ba Saúde.
“Objetivu hosi rezolusaun Governu ida-ne’e atu programa oin-oin ne’ebé iha ona área saúde bele integra iha planu úniku ida hodi fó kuidadu saúde primáriu, sekundáriu no tersiáriu ho forma koordenada no integrada, iha territóriu nasionál tomak, liuhosi kriasaun mekanizmu sira ne’ebé asegura kobertura universál kuidadu ssaúde ne’ebé integrada no iha rejime proximidade, liu-liu iha área territóriu nasionál ne’ebé defísil atu asesu,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : MS partilla planu estratéjiku melloramentu saúde 2020-2024 iha Bobonaro
Planu Integradu ba Saúde ho objetivu atu kontribui hodi hadi’a servisu saúde, no asegura asesu ida ne’ebé jeneralizadu ba kuidadu sira ho kualidade, liuhosi maximiza esforsu hodi garante efisiénsia, transparénsia no profisionalizmu iha jestaun rekursu finaseiru, umanu, materiál no lojístika, nune’e mós iha infraestrutura no ekipamentu sira saúde nian.
Jornalista : Antónia Gusmão
Editora : Julia Chatarina
