DILI, 13 fevereiru 2024 (TATOLI)—Ministériu Asuntu Kombatente Libertasaun Nasionál (MAKLN) daudaun ne’e halo hela konsultasaun ho entidade relevante, ba esbosu alterasaun estatutu Kombatente Libertasaun Nasionál nian.
“Ami agora halo hela konsultasaun ba membru Konsellu Munisipál sira hotu hodi aprezenta esbosu no rona mós sira-nia hanoin mak foin foti alterasaun ba artigu iha lei Komabatente Libertasaun Nasionál nian no sei bá aprezenta iha Konsellu Ministru no Parlamentu Nasionál hodi hetan aprovasaun ba artigu sira ne’e,” Sekretáriu Estadu Asuntu Kombatente Libertasaun Nasionál, César dos Santos da Silva, hateten iha Palásiu Governu, tersa ne’e.
Notísia relevante : Governu altera estatutu orgániku Kombatente Libertasaun Nasionál
Maski nune’e, seidauk iha desizaun kona-ba artigu hira mak sei halo alterasaun tanba presiza iha konsultasaun di’ak.
“Hosi alterasaun artigu balun ne’e, ita seidauk bele ko’alia kona-ba kontribuisaun minoridade (labarik) ne’ebé envolve-an iha funu ne’e atu hetan pensaun ka lae, tanba ne’e aban bainrua ami sei haree polítika saida mak bele aplika ba partisipasaun ne’e,” nia akresenta.
Antes ne’e, iha loron 26 janeiru 2024, Ministru Asuntu Kombatente Libertasaun Nasionál, Gil da Costa ‘Oan Soru’, Sekretáriu Estadu César dos Santos, Prezidente Konsellu Administrasaun Nasionál, Vidal de Jesus ‘Riak Leman’, hamutuk ho Kombatente Libertasaun Nasionál sira halo ona diskusaun esbosu ba alterasaun estatutu kombatente libertasaun nasionál.
Iha loron 31 janeiru 2024, Ministru Gil da Costa konvoka enkontru ho Antigu Prezidente Komisaun Omenajen no atuál Prezidente Autoridade Turizmu Timor-Leste, Virgílio Smith ‘Kranik’, no kontinua halo konsultasaun ho veteranu balun ne’ebé antes ne’e harii komisaun instaladora iha tinan 2019 hodi halo diskusaun kle’an.
Jornalista : Arminda Fonseca
Editora : Julia Chatarina
