DILI, 13 fevereiru 2024 (TATOLI)–Ministériu Saúde liuhosi Institutu Nasionál Saúde Públika Timor-Leste (INSPTL), rejista kazu dengue iha terrritóriu nasionál hamutuk 227.
Diretór Nasionál Institutu Nasionál Saúde Públika Timor-Leste (INSPTL), Filipe de Nery Machado, hateten kazu hirak ne’e rejista hahú hosi primeira semana fulan-janeiru nian to’o setima semana fulan-fevereiru nian ne’e, munisípiu Dili mak rejista kazu dengue aas liu.
“Tuir dadus. Ministériu Saúde rejista kazu dengue 227 ne’e kompostu hosi munisípiu Baucau hamutuk 54, Bobonaru 57, Dili 76, Lautém lima (5), Liquiça 18, Manatuto hitu (7), Manufahi ualu (8) no Viqueque rejista kazu rua (2). Ba munisípiu seluk ne’ebé la temi naran ne’e, provizoriamente, seidauk rejista kazu kona-ba dengue,” Diretór Nasionál Institutu Nasionál Saúde Públika Timor-Leste (INSPTL), Filipe de Nery Machado, hateten ba Agência Tatoli liuhosi WhatsApp, tersa ne’e.
Nia hateten, kazu foun kona-ba dengue kontinua aumenta maibé kazu Chikungunya no Zika laiha mudansa tanba la rejista kazu foun, tanba kazu foun kona-ba moras Chikungunya no Zika ne’ebé rejista ne’e iha fulan-janeiru liubá ne’e.
Tuir dadus, Timor-Leste liuhosi Ministériu Saúde rejista kazu moras Chikungunya hamutuk 147 no moras Zika iha ida (2_ iha inísiu fulan-janeiru tinan ida-ne’e.
Jornalista : Jesuína Xavier
Editór : Cancio Ximenes
