iklan

NASIONÁL, EKONOMIA, HEADLINE

Ministru Gastão aprezenta pontu tolu iha KM

Ministru Gastão aprezenta pontu tolu iha KM

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, tersa (13/02/2024). Imajen Tatoli/Francisco Sony

DILI, 13 fevereiru 2024 (TATOLI)Ministru Planeamentu no Investimentu Estratéjiku, Gastão Francisco de Sousa, halo aprezentasaun pontu tolu iha reuniaun estraordinária Konsellu Ministru (KM) hodi hetan apresiasaun.

Pontu importante sira ne’ebé aprezenta maka kona-ba pontu situasaun no opsaun polítika no legál kona-ba prosesu akizisaun Timor Telecom.

Aleinde ne’e, pontu situasaun no kronograma ba atividade projetu intalasaun kabu submarinu fibra ótika ne’ebé sei liga sidade Dili ho Darwin no Port Hedland.

“Aprezentasaun ne’e destaka importánsia estratéjika hosi projetu ida-ne’e, hanesan infraestrutura importante liu atu fasilita konetividade ba internet ida ne’ebé lais no asesível liu, ne’ebé permite atu promove kreximentu ekonómiku, reforsa dezenvolvimentu sosiál no hadi’a kualidade moris populasaun nian,” refere nota ne’ebé Agência Tatoli asesu hafoin reuniaun ezekutivu, iha Palásiu Governu, tersa ne’e.

Notísia relevante : Governu selebra akordu ho empreza rua instala estasaun aterrajen fibra ótika

Pontu importante seluk, kona-ba polítika nasionál ordenamentu rerritóriu, abranje asaun lubun ida ne’ebé promove hosi administrasaun públika hodi garante organizasaun, utilizasaun no jestaun rasionál territoriál ne’ebé iha perspetiva ba ninia valorizasaun, iha objetivu ba dezenvolvimentu ne’ebé ekilíbradu, integradu no sustentável nomós atu hadi’a kualidade moris ein jerál.

Instrumentu prinsipál hosi polítika ida-ne’e maka planu territoriál sira, ezersísiu interdisiplinár ida iha koordenasaun no integrasaun polítika públika, ho espresaun espasiál ka espasu liuhosi modelu ordenamentu territoriál ida.

Modelu ida-ne’e define organizasaun espesiál iha territóriu determinadu ida (país, munisípiu, sidade), ne’ebé orienta no kontrola intervensaun públika no privadu sira iha territóriu ida-ne’e.

Nune’e, planu nasionál ordenamentu territóriu ne’e define kuadru estratéjiku ba ordenamentu territóriu nasionál iha artikulasaun ho Planu Estratéjiku Dezenvolvimentu (PED), koordena instrumentu polítika setoriál ho insidénsia espasiál no orienta planeamentu territoriál iha ámbitu munisipál.

Planu munisipál ordenamentu territóriu define tuir orientasaun sira ámbitu nasionál nian, kuadru estratéjiku ba jestaun no utilizasaun territóriu munisípiu no ninia rejime kona-ba uzu solu (rai).

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!