DILI, 13 fevereiru 2024 (TATOLI)—Vise-Ministru Administrasaun Estatál, Jacinto Rigoberto, informa, daudaun ne’e Prezidente Autoridade hosi munisípiu lima hanesan Bobonaro, Covalima, Dili, Lautém no Viqueque seidauk simu pose.
“Ministru nia kompeténsia mak halo nomeasaun ba Sekretáriu munisipál no Diretór munisipál sira, maibé ba Prezidente Autoridade rasik, kada proposta hosi ministériu maibé desizaun no nomeasaun hosi Primeiru-Ministru, ho ida-ne’e mak munisípiu lima to’o agora seidauk simu pose,” Jacinto Rigoberto hateten iha Palásiu Governu, tersa ne’e.
Notísia relevante : PAM Manufahi sei foku prioridade tolu durante mandatu
Maski seidauk iha nomeasaun ba Prezidente Autoridade munisípiu Covalima, Bobonaro no Dili, maibé administrasaun munisipál sira simu ona pose.
“Agora parte leste, Viqueque no Lautém rasik nomeasaun ba Prezidente Autoridade rasik inklui estruturura mós seidauk, hein katak tempu badak bainhira Ministru Administrasaun Estatál fila hosi rai-li’ur bele iha nomeasaun no pose tanba iha nesesidade tenke foti desizaun lalais hodi asegura funsionamentu mákina iha munisípiu sira hotu,” nia akresenta.
Kona-ba rekrutamentu pesoál apoiu suku haleu munisípu sira hodi halo esplikasaun kona-ba poder lokál nian, desizaun sei foti bainhira Prezidente Autoridade ho estrtutura hotu simu ona pose.
“Ministériu sei halo rekrutamentu ba pesoál sira hafoin Prezidente Autoridade simu pose, nune’e pesoál sira ne’e bele fó formasaun ba nomeadu sira nune’e idaidaik bele hala’o nia serbisu,” nia tenik.
Prezidente Autoridade no estrutura hosi Liquiçá, Ermera, Aileu, Ainaro, Manufahi, Ataúro, Manatuto, Baucau no Rejiaun Administrasaun Espesiál Oé-cusse Ambeno (RAEOA) simu ona pose.
Jornalista : Arminda Fonseca
Editora : Julia Chatarina
