OÉ-CUSSE, 13 fevereiru 2024 (TATOLI) – Komisaun Instaladora Aeroportu Rota do Sândalo, João Lima Tavares, prefere ba autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, atu konsidera asuntu turizmu no otél sai asuntu sériu durante mandatu.
Tanba, nia dehan, turizmu no otél maka sai garantidu ba vizitante sira (turista) tantu lokál no internasionál atu hala’o vista ba Rejiaun Oé-Cusse Ambeno.
“Kona-bá movimentu aviaun, tanba ida ne’e maka fó osan ba aeroportu laiha seluk, entaun aviaun atu mai iha-ne’e tenke iha razaun ruma maka mai, la’ós sira mai arbiru de’it, ne’e laiha, prepara uluk fasilidade,” João Lima Tavares, informa ba Prezidente Autoridade RAEOA Rogério Tiago Lobato, iha aeroportu Oé-Cusse, segunda ne’e.
Notísia relevante: João Gonçalves hakarak aeroportu Rota do Sândalo sai padraun internasionál
Atuál koordenadór Aeroportu Rota do Sândalo ne’e, relembra, iha mandatu Autoridade anteriór, prefere katak, tanba saida maka aviaun boot sira labele semu mai aeroportu Oé-Cusse atu hala’o vizita.
“Ida-ne’e maka ita tenke hanoin, sei aviaun boot balu mai hosi Japaun, balu mai hosi nasaun Eropa no ASEAN balu, bainhira tún iha aeroportu Rota do Sândalo, pasajeiru ka vizitante tún, atu mai halo saida iha Oé-Cusse, hahán restaurante laiha, atu toba otél laiha, fatin turizmu iha ne’ebé, entaun atendimentu ba sira ladún kompletu, sira bele fila-fali tanba ita seidauk iha kondisaun garantidu hodi fó atendimentu modernu ba vizitante,” nia katak.
Nia hatutan, kuandu seidauk laiha infraestrtura másimu liuliu otél no fatin turizmu atu dada interese públiku, sei la persiza bolu sira, vizitante sei mai rasik, importante kria uluk kondisaun,
“Ida-ne’e la’os aeroportu maka dada aviaun, interese parajeiru sira mak dada aviaun atu mai, ida-ne’e maka fó osan ba aeroportu, tanba sira selu taxa ba portuáriu, selu taxa ba sira seluk-tán, ida-ne’e maka osan tama ba kofre Estadu tenke iha movimentu, sei laiha kondisaun mínimu, pasajeiru mai atu halo saida, purtantu ne’e ita tenke dismistifika buat ne’e,” nia katak.
Entretantu, aeroportu Rota do Sândalo Oé-Cusse, konstrui iha 2015 ezekuta hosi emprezata internasionál Indonézia, PT Wijaya Karya, ho valór kontratu millaun $119,9 hosi Orsamentu Jerál Estadu (OJE) 2016 nian.
Aeroportu ne’e inaugura hosi Prezidente Repúblika, Francisco Guteres ‘Lú Olo’ iha loron 18 juñu 2019 hodi atende rute doméstika no internasionál.
Notísia relevante:Autoridade RAEOA sei estabelese Autoridade Portuáriu atu jere rasik aeroportu Rota do Sândalo
Jornalista: Abílio Elo Nini
Editór: Evaristo Saores Martins
