Umbelina Soares kontinua koopera ho Manatuto-oan hodi kria pás no estabilidade
MANATUTO, 13 fevereiru 2024 (TATOLI)– Komandante Polisia Nasionál Timor-Leste (PNTL) Munisípiu Manatuto, Superintendente Polisia, Umbelina dos Santos Soares, hatete kontinua koopera ho komunidade atu prevene konflitu, nune’e kria pás no estabilidade iha Manatuto.
“Ha’u foin mak mai hala’o kna’ar nu’udar komandante PNTL iha Manatuto, ha’u sei koopera hamutuk ho parte hotu hanesan Autoridade Lokál, Igreja, komunidade no parte relevante hotu atu kria pás no estabilidade hodi kombate konflitu iha Manatuto,” hatete Umbelina ba Agência TATOLI iha Natarbora, foin lalais ne’e.
Relatóriu ne’ebé simu hosi Komandante sesante, Komandante ne’e informa la rejistu kazu konflitu ne’ebé grave, maske iha kazu ki’ik-oan sira.
“Nune’e, ha’u lova ho Manatuto-oan ne’ebé hatudu maturidade di’ak hodi kontribui ba pás no estabilidade,” Superintendente Polísia ne’e agradese.
Tuir relatóriu iha Manatuto rezistu kazu Tránzitu rodoviáriu mak númeru aas uitoan, maibé nu’udar Komandante foun ne’ebé foin kompleta fulan ida sei buka meiu atu halo prevensaun.
“Kazu Tránzitu rodoviariu mak sa’e uitoan tanba kestaun umanu ne’ebé kontra regra uitoan hodi hamosu asidente, maibé ita sei servisu makas atu halo atuasaun no prevensaun,” katak.
Umbelina Soares asume kargu komandante PNTL Manatuto bazeia ba despaisu, Númeru. 05/CG-PNTL/I/2024.
Munisípiu Manatuto kompostu hosi nia Postu Administrativu neen mak hanesan, Manatuto Vila, Laclo, Laleia, Barique, Laclubar no Soibada.
Manatuto geografikamente lokaliza iha parte sentral Timor- Leste, hosi Kosta Norte ba to’o kosta Súl , ho nia totál área hamutuk 1.786 Km2 ho 11,94 % husi totál área Timor-Leste 14,954 Km2 no totál populasaun 42,742.
Notísia relevante:Komandante Henrique fó pose ba superintendente no asistente foun polísia
Jornalista: Hortencio Sanchez
Editór : Florencio Miranda Ximenes
