iklan

EDUKASAUN

Kuarezma hanesan konvite ida lori ema rekonsilia ho Maromak

Kuarezma hanesan konvite ida lori ema rekonsilia ho Maromak

Arsebispu Arkidioseze Metroplitana Dili, Dom Virgílio Kardeál do Carmo da Silva, SDB. Imajen Tatoli/Francisco Sony.

DILI, 14 fevereiru 2024 (TATOLI)–Arsebispu Arkedioseze Mertopolitana Dili, Dom Virgílio Kardeál Do Carmo da Silva, SDB, hateten kuarezma hanesan konvite ida ba ema atu rekonsilia ho Maromak liuhosi grasa Maromak nian.

Notísia Relevante: Kuarezma tempu grasa nian no fatin domin dahuluk nian

Tanba, Dom Virgílio Kardeál hateten, ema-nia forsa la to’o tanba koversaun ema atu muda hahalok no komportamentu ne’e presiza Maromak nia grasa no buka nafatin Nia.

“Atu ita fila ba Maromak la’ós depende ita ema -ia kapasidade, maibé presiza grasa Maromak nian tanba salvasaun mai hosi Maromak,” Dom Virgílio do Carmo hateten iha omilia bainhira prezide misa Kuarta-Feira Sinzas iha igreja Katedrál Imaculada Conceição Vila Verde, kuarta ne’e.

Sarani sira simu ahukdesan iha misa Kuarta-feira Sinzas iha igreja Katedrál, kuarta (14 fevereiru 2024). Imajen Tatoli/Francisco Sony.

Loron kuarta-feira sinzas, ema simu ahukdesan katak ita hosi rai sei fila ba rai, maibé Maromak mak fó iis ba ema ida-idak, tanba ne’e ahukdesan ne’e konvida ema atu hatene serbí, rona, ko’alia no hatene hakuak ema hotu.

Aleinde ne’e, tur nia, kuarezma nu’udar tempu ida lori ema ka sarani sira fila ba Maromak liuhosi atividade halo orasaun, jejun no abstinénsia.

“Kuarezma tempu preparasaun ba paskua, hanesan Maromak nia liafuan hateten ´fila-fali ba ha’u hodi reza, jejun no abstinénsia, atu ita refleta. Ita sarani nia moris nu’udar inan-aman, relijiozu no ukun-na’in, joven no oan atu la’o tuir ita ida-idak nia kna’ar,” Dom Virgílio do Carmo hateten iha omilia bainhira prezide misa kuarezma nian iha igreja Katedral, kuarta ne’e.

Liafuan ida fila-fali ka konversaun iha kuarezma hanesan tempu ida ema atu fila ba Maromak, ezemplu hanesan viola ida karik afina ba para bele fó múzika di’ak. Tempu kuarezma bolu ema atu halo saída, primeiru kreda bolu ema atu harohan, halo di’ak no abstinénsia.

Nune’e, Dom Vitgílio Kardeál hateten, hanesan iha kurta no sexta-feira, loron ne’e loron jejun no abstinensia nian, tanba jejun katak labele han barak no iha ema seluk ne’ebé karik tenke fahe bae ma hirak ne’e no abstinénsia katak tenke tahan aan atu nia final mak prepara aan ba paskua.

Reprezentante sarani katólika, Leandro da Silva, hateten kuarezma hanesan tempu ida ema hotu presiza simu malu no hadomi malu, hodi hatudu domin liuhosi asaun konkreta hodi hatudu domin ba maluk sira-ne’ebé presiza.

“Ita tenke hanoin Maromak iha ita-nia laran hodi fó domin ba ita-nia maluk sira. Se buat ruma bele ajuda ita-nia maluk sira. Iha loron 40 ne’e mós, loron jejun nian, ita buka perdua malu se ita hirus malu akrik, atu bele tuir Nai nia dalan,” nia hateten.

Tanba, kuarezma bolu ema atu hadi’a vida esprituál no isin-lolon nian, basá buat rua ne’e labele haketak malu.

Dom Virgílio Kardeál husu hadomi ambiente

Entretantu, Dom Virgílio Kardeál apela ba ema ka sarani sira hotu atu hadomi ambiente no natureza atu sidade Dili sai moos, bainhira hala’o atividade viasakra iha Cristo Rei Fatucama ne’eba.

Sarani sira selebra Missa Quata Feira Cizas, iha Igreja Catedral Dili, kuarta (14/02). Imajen Tatoli/Francisco Sony

“Viasakra katak ita la’o tuir Jesus nia dalan ka ain fatin, katak lori tuir ita ba dalan ne’ebé loos. Ida-ne’e hanorin ita atu hadomi ita-nia ambiente moos. Ita ba viasakra labele kaer Aqua soe hela iha ne’e no nasi bungkus nia fatin soe arbiru de’it. Ita ba iha Cristo Rei para foer, depois sarani sira halo viasakra mak halo foer hanesan ne’e. Han saida ha’u tenke soe kedas. Tau iha ha’u-nia neon, ha’u tenk3 soe foer iha lixeiru,” Karedál ne’e apela.

Kardeal sujere joven sirea ba viasakra karik, tenke hatudu aan hanesan kristu katak nu’udar joven no sarani hadomi ambiente.

“Ita nia amu Papa hateten hadomi ita-nia ambiente no natureza no ita iha Timor presiza limpeza. Iha Dili, kunadu udan monu rai, iha Dili ita halai, kalan udan boot ita tauk la toba. Tanba, tauk bee sae (inundasaun) kauza hosi ita-nia baleta sira-ne’e nakonu ho foer,” nia dehan.

Arsebispu sujere liután, ema labele hamos nia aan de’it maibé iha li’ur ne’e ema tenke kuida beleza ambientál.

“Kuarezma mós la’o, Jesus mos hadomi ambiente moos. Ita hotu hakaas aan atu kria sidade Dili ne’e moos. Ne’e domin ida-ne’ebé ita hatudu ba malu, nune’e ita nia maluk sira labele hetan moras arbiru. Tanba, ita hotu hatene katak iha tempu udan ne’e moras dengue aumenta barak. Ita timoroan balun lakon vida tanba moras dengue, tanba susuk barak mai hosi foer,” nia dehan.

Jornalista : Jesuína Xavier

Editor       : Cancio Ximenes

iklan
iklan

Leave a Reply

iklan
error: Content is protected !!