Kuarezma tempu hadera aan, halo karidade no abstinénsia
DILI, 14 fevereiru 2024 (TATOLI)-Amo Kapelão Komandu Falintil- Forsa Defeza Timor-Leste (F-FDTL), Kapitau, Rui Gomes, hateten, Kuarezma tempu sarani sira atu hadera aan, halo karidade no halo abstinénsia.
“Ohin ita tama ona domingu sinzas, ho domingu sinzas ida ne’e ita atu simu ahu-kdesan katak, ita hosi rai sei fila ba rai. Ho sinzas ida ne’e, nu’udar tempu kuarezma ba sarani Katólika atu hader aan halo karidade no halo abstinénsia,” Amo Rui Gomes iha nia omilia bainhira prezide misa sinzas iha Kuartel Jenerál F-FDTL Fatuhada, kuarta, ohin.
Saserdote ne’e dehan, hadera aan ne’e signifika katak nu’udar sarani Katólika tenke halo orasaun, halo di’ak ba ema seluk, tulun ema seluk fó tulun sira ne’ebé presiza it-nia tulun.
“Tanba fi’ar ne’e la’ós haree hosi orasaun de’it, maibé fiar ne’e mai mós mai hosi nian hahalok, mai hosi ita-nia jestu sira, ho nune’e mak durante loron 40 iha tempu Kuarezma ida ne’e, ita hader aan halo orasaun no buka tulun malu liuliu ba maluk sira ne’ebé presiza ita -ian tulun,” Nai-lulik ne’e afirma.
Padre Rui Gomes mós husu ba sarani sira liuliu membru forsa armada sira durante loron 40 tenke halo abstinénsia.
“Ita tenke hader aan no halo abstinénsia durante loron 40, katak durante loron 40 ita labele buka kontente iha ita-nia moris, liuliu kanta (karaoke) festa sira ita tenke hamenus ita tempu Kuarezma, ita tenke halo orasaun, buka tulun malu solidariza malu, ida ne’e mak importante hosi tempu kuarezma, hanesan sarani Katólika ita tenke halo ida ne’e,” nia hakotu.
Notísia relevante:Kuarezma hanesan konvite ida lori ema rekonsilia ho Maromak
Jornalista: Natalino Costa
Editór: Rafael Ximenes de A. Belo
