AMB husu dirijente foun ezekuta OJE 2024 ho responsabilidade
BOBONARO, 15 fevereiru 2024 (TATOLI) – Autoridade Munisípiu Bobonaro, kinta ne’e realiza enkontru tékniku nível munisipál ba dahuluk kona-bá programa, sub-programa no atividade ne’ebé atu implementa iha tinan fiskál 2024 ho responsabilidade.
Sekretáriu Autoridade Munisípiu Bobonaro ba Asuntu Planeamentu, Investimentu no dezenvolvimentu Integradu, Semedo Laco Costa, husu dirijente foun servisu munisipál sira atu ezekuta Orsamentu Jerál Estádu (OGE, sigla portugés) 2024 ho responsabilidade bazea ba programa, sub-programa no atvidade sira nune’e bele atinje mets ne’ebé defini ona iha Planu Asaun Anuál (PAA) tinan ne’e.
Enkuantu orsamentu Jeral Estadu 2024 ne’e sai xave ba munisipiu Bobonaro atu tama iha podér lokál no desentralizasaun administrativa.
Notísia relevante: Estrutura foun Autoridade Bobonaro presiza marka diferensa
“Ita espera katak tinan ida-ne’e bele implementa tuir saida mak define ona iha sira-nia meta, osan ne’e estadu nian, ne’ebé ita tenke kuidadu, se karik ita ezekuta tenke hatudu ninia rezultadu, tanba ita-nia orsamentu ne’e orsamentu programátiku. Ne’e duni ita-nia orsamentu ne’e ninia aproximasaun ne’e foka liu ba alkansa rezultadu, nia la husu o gasta hira, maibé nia husu ba rezultádu,” nia hato’o apelu ne’e iha salaun administrasaun munisipál Bobonaro
Nune’e mós, Sekretáriu Autoridade Munisipál Bobonaro ba Asuntu Administrasaun Finansa, Domingos da Costa, reforsa atu atinje meta ne’ebé iha presiza mos kontribuisaun hosi diretór sesante servisu munisipál sira.
Tuir nia, atu dezembolve munisípiu ne’e presiza Bobonaro oan hamutuk lolo-liman ba malu, serbí no la haree ba kór no rasa, tanba futuru iha Bobonaro-oan hotu nia liman.
“Ita-nia funsionariu hotu-hotu ne’ebé durante ne’e asume kargu diretór no xefe departamentu, sira iha obrigasaun atu ajuda diretór foun sira, tanba ita Bobonaro-oan hotu, ho liafuan ida-ne’e mak ita labele sees, apoia nafatin maluk sira foun mai,” nia katak.
Totál orsamentu ne’ebé autoridade Munisipíu Bobonaro hetan alokasaun hosi governu sentrál ba tinan 2024 hamutuk $9,270,244.00, montante ne’e fahe ba kategoria orsamentu Saláriu no Vensimentu $1,913,760.00, Bens no Servisu $897,486.00, kapitál menór $233,998.00, kapitál dezenvolvimentu $2,518,287.00 no transferénsia públika $3,706,713.00.
Orsamentu ne’e hodi finánsia ba programa 12, sub-programa 29 ho nia totál atividade 63 bazea ba planu asaun anuál ne’ebé aprezenta kada diresaun servisu munisipál.
Enkauntu distribuisaun tetu orsamentu 2024 ne’e ba Sekretariadu Munisipál Autoridade Bobonaro hamutuk $5,137,446 (55%), Servisu Munisipál Saúde 214,699 (2%), Servisu Munisipál Edukasaun $2,763,745 (30), Servisu Munisipál Agrikultura $505,793 (6%).
Nune’e mós Obra Públika $137,007 (2%), Água no Saneamentu $190,760 (2%), Jestaun Merkadu no Turizmu $25,202 (0%), Rejistu Notariadu no Kadastru $27,249 (0%), Potesaun Sivíl no Dezastre Naturál $63,438 (1%), Seguransa Alimentár $28,366 (0%), postu administrativu neen $98,553 (1%), Asaun Sosiál $77,986 (1%).
Notísia relevante: Autoridade Bobonaro fahe envelope fiskál 2024 ba diresaun 10 no postu neen
Jornalista: Sérgio da Cruz
Editór: Evaristo Soares Martins
