COVALIMA, 15 fevereiru 2024 (TATOL I) – Florindo de Fátima (matebian) ho nia kaben Celina de Fátima, vítima dezastre naturál ne’ebé akontese iha 2022 seidauk hetan apoiu materiál ba rekuperasaun uma nian, tanba ne’e, faluk ho idade 55 ne’e hein hela tulun husi Governu, liuliu Autoridade Protesaun Sivíl (APC, sigla portugés).
Celina de Fátima ho nia katuas-oan (momentu sei moris) hela hamutuk ho nia oan na’in-rua bainhira anin sobu sira-nian abitasaun no obriga sira tenke bá hela ho nia oan-feto seluk ne’ebé harii ona uma-kain. Vítima ne’e iha oan na’in-neen, haat forma ona família.
Iha aldeia Dais, suku Belekasak, postu Maucatar-Covalima, Celina konta katak depois akontese dezastre, sira simu apoiu emerjénsia husi APC. “Ami simu ai-han no la’ós ai-han hodi hein apoiu materiál ba rekuperasaun, maibé to’o ohin loron seidauk hetan”, nia relata, ohin.
Hodi hein apoiu husi Governu ne’ebé seidauk to’o, Celina mós tenke lakon nia kaben iha dezembru 2023 tanba moras. Daudaun nian esforsu atu halo uma provizória no nian husu tulun ba sé de’it mak hakarak ajuda, tanba nia oan feto ida ho mane ida mak hela hamutuk ho nia.
Ba kestaun ne’e, Xefe Suku Belekasak, Leonito Gusmão, husu Autoridade Protesaun Sivíl atu toma atensaun ba vítima nia preokupasaun tanba daudaun ne’e nafatin hela ho nia família sira.
Nia dehan vítima katástrofe iha 2023 no 2024 nian balun iha ona prosesu atu simu materiál ba rekuperasaun uma, maibé Florindo (matebian) kontinua hein materiál rekuperasaun no osan mão de obra nian.
Komandante APC Covalima, Inspetór Xefe Flávio dos Santos Mendes, klarifika katak APC manda karta ba iha nasionál, maibé husi nasionál mak lahalo prosesu hodi tau fali vítima Florindo nia dokumentu iha arkivu.
“Foin lalais ha’u orienta sira sobu arkivu hodi buka vítima dezastre ho naran Florindo de Fátima nia dokumentu to’o hetan. Vítima hetan apoiu materiál ba rekoperasaun, tanba agora tama ona iha prosesu, nune’e hein de’it bainhira mak atu hetan apoiu”, Flávio dehan.
Tuir dadus vítima dezastre naturál iha tinan 2022 ne’ebé seidauk simu materiál rekoperasaun no osan mão de obra husi APC Covalima hamutuk na’in-ualu,maibé dadaun ne’e tama hotu ona iha prosesu.
Lembra katak, hahú dezembru 2022 to’o 2023, APC Covalima rejista vítima dezastre naturál hamutuk 139 ho tipu dezastre rai halai hamutuk hitu, ahi han uma haat, anin-boot sobu uma 128. APC mós halo verifikasaun dadus ba vítima dezastre naturál ho tipu sira hanesan uma aat kmaan 67, natoon 24, aat totál 47 ne’ebé hetan ona apoiu materiál ba rekuperasaun.
Dadaun ne’e, APC iha hela stock ai-han no la’ós ai-han iha armazein munisípiu Covalima hanesan foos kilógrama 25 iha saku 115, supermie dos 10, sardines dos 50, minak goreng dos 15, bee aqua dos hitu, biscuit wales dos lima, family kitch dos 20, masin-midar kilógrama 357, kafé kilógrama 124, basia 144, balde 13.572 no manta 71.
Notísia relevante: OIM disemina informasaun kona-ba risku dezastre naturál ba autoridade iha Covalima
Jornalista: Celestina Teles
Editora: Maria Auxiliadora
