iklan

EDUKASAUN, MUNISÍPIU, VIQUEQUE

Mota Uelolo sulin tuir estrada difikulta estudante-profesór, presiza normaliza

Mota Uelolo sulin tuir estrada difikulta estudante-profesór, presiza normaliza

Estudante sira la’o iha bee laran hakat ba tuir prosesu aprendizajen

VIQUEQUE, 15 fevereiru 2024 (TATOLI)-Kondisaun atuál Mota Uelolo, sulin tuir estrada, difikulta movimentasaun estudante no profesór sira, ba eskola hodi partisipa no dinamiza atividade aprendizajen lorloron.

Ho situasaun no kondisaun ne’e ne’e, estudante Ensinu Báziku Central (EBC) 05 Uelolo Luka, postu Viqueque Vila, munisípiu Viqueque, Ciquito Soare Viegas, sente triste.

“Durante bee sulin tuir Estrada de’it Estrada maka ami hakuur bá ami-nia eskola.  Dalaruma mota boot entaun ami labele bá eskola no la hetan matéria husi profesór sira. Ami sente triste tanba lakon matéria, tanba mota maka impede ami-nia prosesu aprendizajen. Mota ida-ne’e tuir dalan kuaze tinan tolu ona. Tempu bailoron sente di’ak, maibé tempu udan ami sente sai difikuldade boot ba ami”, Ciquito Soares Viegas, hateten ba jornalista sira, iha área Uelolo, aldeia Uma Boot Luka, ohin.

Ciquito hatutan, impaktu husi sedimentasaun iha ponte Uelolo no mota lahalai  tuir mota, maibé bee hotu-hotu sulin tuir Estrada nune’e estudante no profesór sira ba eskola haree kondisaun klima, udan-boot mota tuun eskola tenke sai paradu tanba dalan bá eskola ida de’it.

“Dalan maka ida-ne’e de’it, ami tenke liu husi ida-ne’e maka ba ami-nia eskola. Dalaruma ami to’o eskola ami-nia farda sira-ne’e boot hotu, ami pasiénsia tuir aula maske boot no malirin ami auguenta”, nia haktuir.

Nune’e, estudante EBC 05 Uelolo ne’e husu Governu tau matan ba mota Uelolo hodi halo normalizasaun no konstrusaun ponte foun hodi fasilita estudante no profesór sira asesu bá eskola.

“Tan ne’e, ami husu ba Governu tau atensaun ba mota Uelolo hodi halo normalizasaun bee no konstrui ponte Uelolo hodi fasilit estudante no profesór sira-ne’ebé hela iha mota sorin,” nia hato’o.

Iha fatin hanesan, Xefe Gabineti Apoiu Tékniku (GAT), Mariano Gomes, relata, mota hahú hala’i tuir Estrada tinan 2021 hodi afeta bá eskola EBC 05 Uelolo nune’e eskola dala ruma la bele ativu tanba bainhira udan prosesu apredizajén tenke paradu.

“Mota Uelolo ne’e afeta bá ami-nia eskola kuaze atu ba tinan haat ona nune’e eskola ne’e dalaruma ladun ativu tanba tempu udan ami tenke hapara prosesu apredizajen”, nia konta.

Ho razaun tanba mota no dala ruma estudante husi uma bá eskola maka  farda bokon profesór  tenke haruka sira fila bá uma tanba bokon ne’e bele afeta fali   estudante sira-nia saúde.

Notísia relevante: https://tatoli.tl/2024/02/13/komunidade-dilor-no-luca-husu-mop-konstrui-ponte-iha-mota-uelolo/

Tanba ne’e profesór EBC 05 Uelolo sujere ba ministériu relevante Ministru Obras Públika (MOP) normaliza lalais mota Uelolo no kontrui ponte Uelolo ne’ebé Governu orienta Empreza JONIZE UNIP LDA sobu atunune’e labele prejudika ba estudante, profesor no abitante sira. Liu Liu ba estudante sira  tanba estudante maka futuru nasaun nian, maibé agora estudante sira asesu bá eskola difisil tanba kondisaun mota.

Enkuantu, tuir dadús hosi estudante EBC 05 Uelolo no pre-eskolár ho totál hamutuk na’in-94.

Iha biban ne’e, reprezenta aman hosi estudante   EBC 05 Uelolo, Lozinho Viegas, haktuir, kada loron loron dada nia oan bá eskola hodi tuir prosesu apredizajen tanba nia oan foin idade tinan neen, susar atu hakuur mota ba eskola nune’e nia tenke lori no sai tenke ba foti fali.

“Ho situsaun ne’e, ha’u sente triste tanba ami tenke loron loron lori oan ba eskola. Tanba mota Uelolo, se bele Governu tau matan ba hodi ami-nia oan sira ba eskola la’o di’ak,” nia sublia.

Tuir observasaun jornalista Ajénsia TATOLI, I.P nota katak dadaun ne’e mota kontinua tuir Estrada ho kondisaun bee metru 30 no husi rai-maran ba to’o edifísiu EBC 05 Uelolo distánsia metru 50, bainhira estudante sira bá eskola tenke hasa’i sapatu no estudante na’in rua tolu tenke dada malu hafoin to’o iha edifísiu eskola.

 

Jornalista : Vitorino Lopes da Costa

Editór         : Rafael Ximenes de A. Belo

iklan
iklan

Leave a Reply

iklan
error: Content is protected !!