iklan

MUNISÍPIU, VIQUEQUE

Komunidade Dilor no Luca husu MOP konstrui ponte iha mota Uelolo

Komunidade Dilor no Luca husu MOP konstrui ponte iha mota Uelolo

Komunidade sira hakur mota Uelolo tanba laiha ponte.Imajén Tatoli/Vitorino Lopes da Costa

VIQUEQUE, 13 fevereiru 2024 (TATOLI)- Komunidade ho autoridade lokál iha suku Dilór, postu Lacluta no suku Luca, postu Viqueque Vila, munisípiu Viqueque, husu ba Governu liuhosi Ministériu Obra Públika (MOP) atu konstrui ponte no normaliza mota Uelolo hodi fasilita movimentasaun komunidade no transporte públiku.

“Husu Governu liuliu Ministériu Obra Públiku (MOP) atu halo normalizasaun no kontrui ponte iha mota Uelolo tanba daudaun difikulta abitante sira ne’ebé hela iha área Uefia halo movimentasaun,” Portavós no atuál Xefe Suku Dilór, Postu Lacluta, Jacinto Ximenes liuhosi konferénsia impresa iha área Uefia-Viqueque.

Notísia relevante:  Autoridade suku Dilor husu Governu hadi’a dalan ba suku tolu

Husu ba MOP atu konstrui ponte Uelolo tanba sai dalan alternativu atu bá kapitál Viqueque no mai iha Dili ka nasionál.

Imajén Tatoli/Vitorino Lopes da Costa

“Ita-nia abitante sira asesu ba merkadu mós ladi’ak, moras ruma atu halo transferénsia mós la’o dook mak foin sa’e karreta. Ida-ne’e sai hanesan problema sériu ba povu, Nune’e Governu presiza rezolve lalais”, nia sujere.

Iha fatin hanesan, Xefe Suku Luca, postu Viqueque Vila, Viqueque, Manuel Gomes, mós preokupa no husu konstrui ponte Uelolo hodi populasaun bele asesu ba merkadu no fasilidade saúde.

“Ha’u preokupa tebes kondisaun ponte no estrada ne’ebé liga mai aldeia Uefia, ami-nia povu atu lori produtu lokál ruma bá merkadu ladi’ak tanba mota tuun. Tanba ne’e, husu ba Governu atu bele tau matan ba infraestrutura”, autoridade lokál ne’e reforsa.

Iha fulan outubru 2023, Ministériu Obra Públiku (MOP) orienta empreza JONIZE Unipesoál Lda sobu tiha ponte Uelolo no promote ba abitante sira katak fulan tolu tan ponte halo hotu ona, maibé to’o agora ponte seidauk halo.

“Iha momentu ne’ebá, ami husu empreza atu labele sobu, maibé empreza sira lori despaixu husi Ministériu Obra Públiku (MOP) hodi sobu no promote ba ami katak fulan tolu de’it ponte kontrui hotu ona, maibé to’o agora ponte seidauk konstrui. Daudaun abitante iha ne’e maioria vida agrikultór no balun kréditu osan hodi bá fa’an modo maka selu ema osan, maibé agora sira labele halo buat ruma. Tan ne’e ami husu MOP atu bele toma atensaun sériu”, Komunidade ne’e afirma.

Daudaun ne’e, bee halai tuir estrada ne’ebé difikulta estudante labele ba eskola, inan isin-rua labele bá asesu fasilidade saúde.  Alende ne’e mota Uelolo nakonu ba uma-kain 31 ne’ebé bee tama iha aldeia Uma Boot, suku Luca, postu Viqueque Vila.

Notísia relevante: Komunidade husu MOP konstrui ponte iha Molop no mota Laku

Jornalista : Vitorino Lopes da Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!