DILI, 14 fevereiru 2024 (TATOLI) – Defeza hosi Profesór nain-10 Advogadu Privadu, Octavio Cardoso, hateten Ministériu Públiku (MP) deside liberta profesór sira ne’ebé polísia detein iha sela detensaun Komandu PNTL Munisípiu Dili, foin daudaun ne’e, tanba la iha indísiu krime.
“Durante prosesu dilijénsia ne’ebé halo iha Ministériu Públiku, Prokuradór ne’ebé ka’er prosesu ne’e haree no entende katak la iha indísiu ne’ebé sufisiente hodi hatudu katak profesór sira-ne’e komete krime. Tanba ne’e Prokuradór ne’ebé ka’er prosesu ne’e deside hodi la kontinua prosesu ne’e ba interogatóriu dahuluk iha Tribunál Judisiál Primeiru Instánsia no Ministériu Públiku deside liberta profesór na’in-10 ne’e”, Octavio Cardoso hateten ba jornalista sira hafoin akompañia profesór sira ba Ministériu Públiku Matadoro, kuarta ne’e.
Nia esplika, hafoin polísia detein profesór na’in-10 no kumpre oras 72 iha sela detensaun Komandu Munisípiu Dili, tuir regra prosesuál, profesór sira-ne’e submete ba interogatóriu dahuluk iha Tribunál Judisiál Primeira Instánsia Dili, maibé MP deside halo dilijénsia ba professor sira no iha prosesu dilijénsia ne’e MP entende katak la iha indísiu krime.
Nia hateten, Defeza haree katak desizaun MP nian ne’e, razoavél no tuir duni aktu prosesuál, tanba momentu ne’e, profesór kontratadu sira halo manifestasaun hodi hato’o sira-nia protestu ba Ministériu Edukasaun hodi ezije sira-nia direitu hanesan manorin nain tanba balun hanorin tinan 10 ona maibé Governu la rekoñese no momentu sira halo asaun la estraga buat ruma.
Cardoso haktuir, momentu ne’ebá tanba polísia halo kedan intervensaun tanba konsidera sira (profesór) nia asaun ne’e viola regra manifestasaun nia tanba halo asaun besik liu portaun no kria disturbu, tanba ne’e ita-nia autoridade seguransa detein profesór sira-ne’e.
“Maibé Ministériu Públiku nudar nain ba asaun penál haree katak profesór sira ne’e nia asaun la iha indísiu krime tanba ne’e mak deside liberta profesór sira ne’e”, nia dehan.
Notísia relevante : Polísia detein profesór na’in-10 ne’ebé halo asaun pasífika iha edifísiu ME
Jornalista: Natalino Costa
Editór : Zezito Silva
