iklan

ATAÚRO, HEADLINE

PAA Ataúro foun fó prioridade ba infraestrutura bázika durante mandatu

PAA Ataúro foun fó prioridade ba infraestrutura bázika durante mandatu

Dili Atauro

DILI, 15 fevereiru 2024 (TATOLI)—Prezidente Autoridade Administrativu (PAA) munisípiu Ataúro, Mateus Belo, hakarak fó prioridade ba infraestrutura bázika durante mandatu.

Prezidente Autoridade Administrativu Ataúro ho nia estrutura simu ona pose iha loron 09 fevereiru 2024.

“Ataúro nu’udar illa ida haketak hosi tasi sei tau prioridade uluk ba infraestrutura bázika, liu-liu estrada, ita sei hadi’a hotu estrada liga bá área rurál sira bele di’ak nune’e komunidade bele asesu ba merkadu, saúde no edukasaun,” Mateus Belo informa ba Agência Tatoli, via telefónika, kinta ne’e.

Nia konsidera, dezenvolvimentu atu la’o tenke iha estrada di’ak nune’e durante mandatu nia parte sei halo esforsu hosi halo dezenvolvimentu hahú hosi baze mak sa’e liuhosi Fundu Espesiál ba Dezenvolvimentu Ataúro (FEDA).

Notísia relevante : PN aprova Fundu Espesiál ba Dezenvolvimentu Ataúro iha espesialidade

Aleinde ne’e, nu’udar Autoridade, nia sei tau mós prioridade ba bee-moos tanba durante ne’e nota katak komunidade iha Ataúro difísil aseau bee-moos, tanba ne’e agora tenke esforsu hodi bele asesu. Aleinde ne’e iha aldeia lima mak seidauk asesu liña eletrisidade.

“Ha’u-nia mandatu sei halo esforsu dada liña eletrisidade ba sira. Parte seluk ita sei tau atensaun maka’as ba dezenvolvimentu turizmu iha Ataúro tanba fatin ne’e iha rekursu potensiál boot ba turizmu,” nia akresenta.

Tanba ne’e, nia komprometidu atu promove maka’as turizmu no eko-turizmu iha Ataúro atubele garante sustentabilidade ekonomia no bele proteje ambiente, kultura no ekonomia lokál.

“Maibé antes to’o ba ida-ne’e, ita mós tenke hadi’a uluk portu no aeroprtu sira nune’e ne’ebé bele sai di’ak hodi fasilita ita-nia vizitante sira hakarak mai,” Mateus Belo hateten.

Liga kona-ba dezentralizasaun poder lokál ba Ataúro, nia estatutu diferente ho munsípiu sira seluk tanba liga ba númeru eleitór iha Ataúro seidauk to’o ba futuru bele iha eleisaun dezentralizasaun ba poder lokál.

“Ita ko’alia kona-ba dezentralizasaun administrativa no poder lokál ita bele konkretiza tanba hetan delegasaun kompeténsia hosi Governu sentrál mai Ataúro maibé poder lokál ne’e liuhosi eleisaun munisipál, entaun Ataúro ba tina- lima no sanulu numeru eleitór menusc, entaun ita avansa ho administrasaun administrativa de’it,” PAA tenik.

Maibé kontinua nafatin esforsu halo preparasaun tanba delegasaun lubuk ida ne’ebé delega mai ne’e hakbesik serbisu Governu ba komunidade liga ba atendimentu públiku hodi grante dezenvolvimentu adekuadu ba Ataúro.

Antes ne’e, iha loron 19 dezembru 2023 Parlamentu Nasionál liuhosi debate Orsamentu Jerál Estadu espesialidade aprova FEDA hamutuk $2.723.605.

Hosi orsamentu $2.723.605, fahe ba kategoria saláriu no vensimentu $250.391, bens no servisu $634.215, tranferénsia públika $150.000, kapital menór zero no kapital dezenvolvimentu $1.688.999.

Ataúro rasik, lokaliza kilómetru 25 norte hosi Dili, kapitál nasaun nian,  ne’ebé nu’udar illa kiik ida iha Timor-Leste ho nia beleza natureza ne’ebé poténsia ba ekoturizmu.

Ataúro ho nia luan kuaze kilómetru kuadradu 117, naruk 25k no luan kilómetru 9, illa ne’e fahe ba suku lima hanesan Makili, Vila Maumeta, Beloi, Bikeli, no Makadade, ho totál populasaun kuaze 10.000 resin, ne’ebé ho peofisaun maioria nu’udar peskadór no agrikultór.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!