iklan

HEADLINE, SEGURANSA

PNTL: Halo asaun pasífika tenke kumpre Lei Liberdade ba Reuniaun no Manifestasaun

PNTL: Halo asaun pasífika tenke kumpre Lei Liberdade ba Reuniaun no Manifestasaun

Portavós Komandu Jerál PNTL, Superintendente Polisia, António da Luz. Imajen /Tatoli

DILI, 15 fevereiru 2024 (TATOLI) – Komando Polísia Nasionál Timor-Leste (PNTL) husu ba profesór kontratadu sira bainhira hakarak halo asaun pasífika hasoru Ministériu Edukasaun (ME) tenke kumpre lei ne’ebé maka hatuur ona iha artigu 5 iha Dekretu-lei númeru 01/2006, 8 fevereiru, kona-ba Liberdade ba Reuniaun no Manifestasaun.

Komando Jerál PNTL hato’o ida ne’e  ba públiku relasiona ho polémika ne’ebé maka akontese foin lalais bainhira membru Polísia sira halo atuasaun ba manorin sira ne’ebé halo manifestasaun iha edifísiu Ministériu Edukasaun ne’ebé konsidera la ho profisionál.

Portavós PNTL, Superintendente Polísia António da Luz, hatete asaun ne’ebé maka Polísia sira halo ne’e hatudu ona sira-nian profisionalizmu ba ema ka grupu tanba sira halo sein iha koñesimentu ba Komando Polísia. Tanba ne’e maka intervensaun Polísia nian hodi hapara manisfestante sira-nian protestu ho espanduk ne’ebé sira lori no loke iha edifísiu ME nia oin.

“Karik ema ka grupu ida maka la konkorda ho desizaun ruma ne’ebé fó sai ona no hakarak halo asaun protesta liuhusi manifestasaun ruma ne’e sira-nian direitu, maibé tenke hatene katak nasaun ne’e regula mós ho lei  ne’ebé konsagra ona iha ita-nian konstituisaun rasik”, Superintendente Polísia António da Luz hatete iha konferénsia imprensa ne’ebé hala’o iha Kuartél Jerál PNTL-Caicoli, ohin.

Iha Dekretu-lei númeru 01/2006, 8 fevereiru, ko’alia kona-ba Liberdade ba Reniaun no Manifestasaun no iha artigu 5 iha dekretu refere hatete klaru sobre restrisaun, katak bandu atu realiza reniaun no manifestasaun iha fatin públiku ka nakloke ba públiku menus husi metru 100 husi fatin ne’ebé lokaliza iha sede órgaun soberania nian, rezidénsia ofisiál titulár, instalasaun militár no militarizada, estabelesimentu prizionál, sede reprezentasaun diplomátika no konsulár no sede partidu polítiku.

Superintendente Polísia António da Luz hatete katak ema hotu iha direitu atu halo menifestasaun maibé tenke kumpre regra ne’ebé bandu ema labele halo besik iha fatin sira ne’ebé determina ona.

António da Luz lembra katak profesór sira hato’o ona sira-ninia pedidu ba Komando Jerál PNTL iha janeiru 2024 hodi husu lisensa atu hala’o manifestasaun hasoru ME no sira husu Polísia atu asegura asaun ne’ebé halo. Husi pedidu ne’ebé sira submete ne’e parte Komando Polísia liuhusi Komisáriu Jerál PNTL halo kedan enkontru hamutuk ho portavós manorin nian hodi diskute asuntu lubuk ida no konsege deside fatin atu hala’o manifestasun maka iha Tasi Tolu.

“Antes ne’e, sira husu atu halo asaun iha Jardín 5 de Maio no husu mós halo iha B.J Habibie, maibé komando la aseita fatin sira ne’e tanba besik ho edifísiu órgaun soberania nian, tanba ne’e tenke bá halo duni iha Tasi Tolu”, nia dehan.

Portavós ne’e salienta katak PNTL fó duni apoia seguransa ba manifestante sira halo asaun iha Tasi Tolu durante loron haat nia laran no depois ida ne’e sira kontinua mai halibur malu fali iha Jardín 5 de Maio hodi kontinua asaun protesta liuhusi konferénsia imprensa hodi la konkorda ho desizaun ME nian. Maibé, husi asaun sira ne’e maka ikus mai sira konvoka malu sein iha koñesimentu Polísia nian bá iha edifísiu ME hodi halo protesu no hetan detensaun.

“Manorin balun hetan detensaun iha sela Komando Polísia Munisípiu Dili tanba la koopera ho Polísia. Sira la fó karta koñesimentu mai depois sira bá loke espanduk iha edifísiu Ministériu Edukasaun maske sira la estraga sasán ruma, maibé sira la obedese ona ba lei sira. Entaun, PNTL konsidera sira kontra lei ne’ebé regula iha artigu 5 iha dekretu-lei ne’e rasik”, dehan.

Nia sujere katak, ba futuru, profesór sira atu kontinua halo sira-nian asaun, importante liu maka tenke submete karta koñesimentu ba Polísia no tenke koopera, nune’e bele fó apoiu seguransa. Polísia lakohi bainhira asaun ne’ebé profesór sira halo ne’e ema seluk aproveita fali hodi halo fali buat seluk.

Rekorde katak Polísia detein, iha segunda ne’e, profesór na’in-10 tanba halo manifestasaun iha edifísiu Ministériu Edukasaun sein halo karta koñesimentu ba Komando Polísia Munisípiu Dili no, iha loron 14, manorin sira ne’e liberta husi sela detensaun tanba laiha indísiu ba krime ruma.

Notísia relevante: MP liberta profesór sira tanba la iha indísiu krime

Jornalista: Tomé Amado       

Editora: Maria Auxiliadora

iklan
iklan

Leave a Reply

iklan
error: Content is protected !!