iklan

JUSTISA, HEADLINE

Prioridade MJ Sergio Hornai hafoin simu pose

Prioridade MJ Sergio Hornai hafoin simu pose

Ministru Justisa foun Sergio de Jesus Fernandes da Costa Hornai. Imajen Tatoli/Egas Cristóvão

DILI, 15 fevereiru 2024 (TATOLI)-Ministru justisa, Sergio Hornai hateten, frajilidade iha Ministériu Justisa (MJ) hanesan sirkuntánsia ida ita presiza konsolida ba oin.

“Ita iha ona Polísia Sientífiku Kriminál (PSIK), iha Tribunál, ita sei halo koordenasaun mós ba iha órgaun hotu ne’ebé tutela iha Ministériu Justisa tenke tau atensaun hodi dezenvolve,” Ministru Sergio, ba jornalista sira iha Palásiu Prezidensiál, Dili, kinta ne’e.

MJ iha órgaun konsellu konsultivu ida atu halo dezeñu ba setór justisa maske iha operadór setór justisa iha Tribunál, Prokuradoria, advogadu, ofisiál justisa, defensór públika no seluk tan.

Tuir nia, kona-ba reforma setór justisa forma ida mak tenke halo artikulasaun ba iha Governu da-sia ne’ebé tau ona prioridade ba reforma setór justisa atu garante justisa ne’ebé hanesan ba ema hotu.

Tau prioridade ba pasaporte no defensoria públika

Durante mandatu, Hornai sei tau prioridade hodi komunga preokupasaun Prezidente Repúblika nian kona-ba validade pasaporte ba sidadaun sira.

“Ita sei tau iha konsiderasaun kona-ba validade pasaporte ba iha sidadaun sira tuir saida mak Xefe Estadu husu ona, ita sei moderniza iha atendimentu pasaporte no dokumentu hotu ne’ebé Ministeriu Justisa halo ba sidadaun sira,” nia katak.

Antes ne’e, Xefe Estadu husu ba MJ liuliu Diresaun Notariadu atu fó validade pasaporte ba sidadaun sira to’o tinan 10 labele tinan lima de’it.

Enkuantu kona-ba oinsá mak tau prioridade ba dezenvolve defensoria públika Ministru ne’e aseita no ba oin sei hala’o servisu ne’ebé másimu hodi servi povu no nasaun.

 

Planu prioridade no agradesimentu

“Ha’u mai substitui de’it ha’u-nia kolega Saudozu Amandio de Sá Benevides. Ha’u sei la’o tuir de’it saida mak iha ona tuir orsamentu ne’ebé iha ona,” nia tenik.

Alende ne’e, membru governu foun ne’ebé mak ohin hetan pose husi Prezidente repúblika, José Ramos Horta, agradese ba Partidu Governu – CNRT no PD, ne’ebé mak fó ona konfiansa ba nia hodi lidera MJ ba périodu ida.

“Agradese ba parte hotu, agradese ba Partidu Governu ne’ebé fó ona konfiansa mai ha’u atu asumi responsabilidade ida ne’e. Kargu ne’ebé ha’u simu hanesan responsabilidade la’ós oportunidade,” nia konklui.

Notísia relevante:Xefe Estadu husu MJ foun kria kondisaun dezenvolve setór justisa

 Jornalista: Hortencio Sanchez

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!