iklan

HEADLINE, SEGURANSA

Feto sei prienxe kuota 20% iha rekrutamentu membru Polísia foun

Feto sei prienxe kuota 20% iha rekrutamentu membru Polísia foun

Ministru Interiór, Francisco Guterres, akompaña husi Komandante Jerál PNTL, Henrique da Costa ho segundu komandante Pedro Belo, iha enkontru ho eis-membru polísia reformadu iha Sentru Formasaun Polísia Comoro, Dili, tersa (11/07/2023). Imajen Tatoli/António Daciparu

DILI, 16 fevereiru 2024 (TATOLI) – Ministru Interiór, Francisco da Costa Guterres, informa katak rekrutamentu ba membru Polísia foun ne’ebé sei hala’o iha marsu sei fó kuota 20% ba feto sira, nune’e bele hasa’e númeru partisipsaun feto iha Instituisaun Polísia Nasionál Timor-Leste (PNTL).

Ministru Interiór ne’e dehan,  tuir loloos,  feto nia envolvimentu iha instituisaun seguransa ne’e atinje ona alvu 18%, maibé foin maka iha de’it 15%. Tanba ne’e, oportunidade ba tinan ida ne’e, Ministériu Interiór no Komando Jerál  tau ona kuota 20% ba feto iha prosesu rektutamentu ne’ebé sei mai.

“Ita sei la tau prioridade ba feto iha rekrutamentu Polísia foun, maibé ita sei tau kuota 20% ba feto”, governante afirma iha Otél Timor, ohin.

Ministru salienta katak kuota 20% ba feto ne’e tama ona iha ajenda diskusaun nivel altu nian, nune’e bele hatene proporsionalidade ba feto ne’e atu foti hira loos, tanba ne’e maka presiza iha diskusaun di’ak ida hodi bele hetan desizaun ba partisipasun feto nian iha instituisaun PNTL nia laran.

“Ha’u hanoin ona atu  matein ho kuota 20% ba feto, nune’e ita bele hasa’e kuota 15% ne’ebé ita iha ona, nune’e ita bele rezolve tiha alvu 18% ne’ebé ita seidauk atinje ne’e. Agora, 20% ne’e konsidera númeru mínimu, karik iha prosesu rekrutamentu nia laran maka númeru feto kontinua sa’e ho abilidade di’ak, sira-ninia kuota 20% ne’e bele aumenta. Maibé, kuandu partisipasaun feto nia maka la atinje porsentu ne’ebé tau ona, ministériu sei buka solusaun”, governante esplika.

Ba rekrutamentu membru Polísia foun ne’e sei la’o ho transparénsia hanesan ho prosesu sira ne’ebé maka halo ona iha tinan sira liu bá kotuk. Sei iha envolvimentu parte hotu ne’ebé kompetente ba posesu ne’e, inklui ministériu lubuk ida, Parlamentu Nasionál nomós partisipasaun membru forsa Guarda Nasionál Republikanu (GNR) Portugál nian atu prosesu ne’e bele hetan akompañamentu ida di’ak liu.

Iha rekrutamentu ne’e munisípiu hotu sei hetan oportunidade hotu. Ninia kritériu maka sei define munisípiu ida mane no feto hira, nune’e bele iha balansu igualdade jéneru atubele tau hasa’e taxa partisipasaun feto nian iha Planu Asaun Nasionál 1325 konaba feto, pás sno seguransa.

Rekorde katak Ministériu Interiór deside númeru rekrutamentu membru foun ba PNTL ba tinan ne’e sa’e ba 250 no prosesu ida ne’e hein desizaun husi Primeiru-Ministru, Xanana Gusmão.

Notísia relevante: Rekrutamentu membru polísia foun hein desizaun husi Primeiru-Ministru

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!