DILI, 16 fevereiru 2024 (TATOLI)—Jerente Institutu Defeza Direitu ba Labarik (INDDICA, sigla portugés) rekoñese la’ós fasil rezolve imediata labarik fa’an sasán iha dalan ninin.
“Iha tinan ne’e ita seidauk halo fali esesmentu foun, sei mantein nafatin dadus ne’ebé uluk ita halo ona hamutuk 300, dadus sira ne’e ita foti iha estrada, merkadu laran no jardin sira, maski ita halo esforsu maibé hanesan ita hatene katak kestaun labarik sira kontinua fa’an sasán iha estrada ida-ne’e la’os kestaun ida fasil atu rezolve imediata,” Prezidente INDDICA, Dinorah Granadeiro, hateten, iha salaun Ministériu Solidaridade Sosiál no Inkluzaun (MSSI), Caicoli, sesta ne’e.
Preokupasaun ne’e sai mós preokupasaun ida ba membru Parlamentu Nasionál, nune’e parte INDDICA kontinua halo monitorizasaun ba labarik sira.
“Monitorizasaun ne’e hatudu katak labarik sira, liu-liu labarik feto sira barak mak fa’an sasán to’o kalan 10h00. Haree mós katak labarik sira ne’ebé fa’an antes ne’e balun ita la haree ona, maibé iha mós labarik foun balun,” nia akresenta.
Notísia relevante : INDDICA preokupa labarik barak hosi Oé-Cusse fa’an sasán iha Dili
Lei kona-ba protesaun labarik nian daudaun foin mak atu hahú implementa no presiza mós lei seluk ne’ebé atu fó forsa baze legál mai INDDICA atu halo serbisu ne’e.
Iha konstituisaun artigu 18 (Protesaun ba labarik-oan sira) haktuir, labarik sira iha direitu ba protesaun espesiál hosi família, komunidade nomós Estadu, liu-liu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.
Labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé Estadu aprova no simu ona ka ratifika filafali.
Labarik hotu-hotu ne’ebé moris iha kazamentu nia-laran ka lae iha direitu hanesan kona-ba protesaun sosiál.
“Meiu seluk ne’ebé ami uza atu kontrola labarik sira ne’ebé kontinua fa’an sasán iha dalan ninin agora mak serbisu hamutuk ho Polísia Nasionál Timor-Leste (PNTL), bainhira ita tun halo monitorizaun ita hamutuk tun hotu ba baze hodi evita labarik sira fa’an sasán,” Dinorah Granadeiro tenik.
Maneira seluk ne’ebé iha tinan ne’e sei halo mak iha tempu badak INDDICA mós sei fó informasaun liuhosi mídia atu fó hatene ba públiku, liu-liu inan aman família sira atu labele kontinua uza labarik sira hakonu fali nesesidade família nian.
Objetivu meiu publikasaun ne’ebé INDDICA halo atu fó hanoin ba sosiedade sira oinsá mak bele kuida labarik sira no fó protesaun ba sira.
“Atu hakonu nesesidade família nian la’ós obrigasaun dever labarik sira nian maibé id- ne’e dever no obrigasaun inan aman ka ema ne’ebé mak responsável ba sira,” nia salienta.
Haree ba labarik sira ne’ebé kontinua fa’an sasán iha dalan ninin ne’e maihosi RAEOA, maka INDDICA mós marka ona audénsia ho Prezidente RAEOA no iha tempu badak sei hasoru malu hodi ko’alia oinsá atu haree mekanizmu hodi bele asegura labarik sira hosi ne’ebá mai fa’an iha Dili.
“Antes ne’e labarik sira ne’ebé ita rejistu konsege ita entrega ona ida ba fali nia família iha Oé-cusse, ita kontinua monitoriza labarik daudaun hela metin ona nia família la mai ona Dili, agora ita kontinua serbisu hamutuk ho Prezidente RAEOA atu labarik sira labele kontinua mai fa’an sasán hanesan manu-tolun, pentolan no seluk tan iha Dili,” Dinorah dehan.
Jornalista : Arminda Fonseca
Editora : Julia Chatarina
