iklan

POLÍTIKA

Komisaun E halo fiskalizasaun ba implementasaun projetu emerjénsia iha Ainaro-Baucau

Komisaun E halo fiskalizasaun ba implementasaun projetu emerjénsia iha Ainaro-Baucau

Deputado CNRT, Marcos Xavier. ImajenTATOLI

DILI, 16 fevereiru 2024 (TATOLI)—Komisaun E trata asuntu Infraestrutura iha Parlamentu Nasionál (PN), hala’o ona fiskalizasaun ba implementasaun projetu emerjénsia iha munisípiu Ainaro ho Baucau.

Notísia Relevante: Komisaun E husu aselera implementasaun projetu emerjénsia

“Iha Orsamentu Retifikativu (OR) 2023, Ministru rasik ko’alia iha plenária katak,  iha obra ne’ebé emerjénsia hamutuk 57 maibé realidade iha projetu 16 mak hetan kontratu hosi Governu. Nune’e foin daudaun ami ba halo fiskalizasaun iha Ainaro iha projetu emerjénsia lima (5). Projetu rua (2) finaliza ona no sira atu halo pagamentu mak iha redusaun ba orsamentu refere la tuir kontratu inisiál ne’ebé mak iha. Maibé, Governu iha vontade atu rezolve nafatin no projetu balun seidauk la’ o tanba seidauk iha kontratu,” Prezidente komisaun E, Deputadu Marcos Xavier, hateten iha Parlamentu Nasionál, sesta ne’e.

Komisaun nota projetu emerjénsia maiória la’o maibé balun seidauk la’o tanba de’it laiha kontratu, hanesan projetu lima ne’ebé iha Ainaro mak sira halo moru protesaun, paviaun, ida ne’e mak Ajénsia Dezenvolvimentu Nasionál (ADN) tun ba verifika redus tiha orsamentu.

Iha kontratu ne’e, iha orsamentu hamutuk rihun $168 depois ADN redús tiha rihun $117, entaun kompañia mós la konkorda tanba kompañia kaer nafatin kontratu inisiál.

“Horisehik mós ami hala’o fiskalizasaun iha Baucau ne’ebé iha projetu emerjénsia ida (1) ne’e bronjong ka paviaun agora la’o no atinje ona 60%, no tempu besik finaliza,” nia dehan.

Nune’e, komisaun hala’o ona fiskalizasaun ba projetu emerjénsia lima (5) iha munisípiu Ainaro no ida 91) iha Baucau, no tuir planu sei hala’o mós fiskalizasaun ba projetu 10 iha munisípiu seluk iha tempu badak.

Komisaun nota iha obra barak la’o ona no balun la la’o tanba laiha kontratu, se kompañia ida halo obra ida laiha kontratu mak Ajénsia Dezenvolvimentu Nasionál (ADN) seidauk verifika mak nia ba halo orsida halo ida-ne’e tuir ninia hakarak.

Ho nune’e mak komisaun nia dever mak halo fiskalizasaun tanba tau tiha orsamentu no aprova haree Governu implementa ka lae no obra sira-ne’e la’o ka lae.

Prezidente komisaun E ne’e hateten, hosi fiskalizasaun ba munisípiu rua (2) ne’e mak komisaun hakarak rekomenda ba Governu liuhosi Ministériu Obra Públika (MOP), se bele maske projetu ne’e emerjénsia, Governu bele fó ona orden serbisu hodi fó kbiit ba kompañia ida ka rua atu halo obra ne’e.

Maibé, kompañia mós tenke hein lai ADN verifika tiha obra ne’e ho nia montante hira, depois iha ona kontratu mak kompañia refere bele halo.

“Se lae akontese hanesan projetu 16 ne’e, ADN la verifika. Entaun, to’o iha pedidu pagamentu kompañia halo ba ADN redús tiha orsamentu ne’e, entaun kompañia la simu, kulpa ne’e labele ba iha kompañia. Kulpa ne’e ba iha Obras Públika ou ADN tenke haree momentu atu fó obra ne’e tenke verifika didi’ak, maske projetu ne’e emerjénsia maibé tuir kriteira ne’ebé iha,” nia hateten.

Prezidente Komisaun E ne’e husu atu aselera implementasaun projetu emerjénsia sira, tanba implementasaun projetu ne’e emerjénsia no infraestrutura sira-ne’e hetan estragu hosi dezatre naturál iha tinan kotuk nian.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!