VIQUEQUE, 16 fevereiru 2024 (TATOLI)-Governu liuhusi Ministériu Administrasaun Estatál (MAE) extende tan kontratu ba enjeñeiru diresaun Planu Dezenvolvimentu Integradu Munisipál (PDIM) hamutuk na’in sia hodi kontrola projetu sira ne’ebé mak daudaun ne’e seidauk finaliza.
Diretór PDIM Viqueque, Domingos de Carvalho Monteiro, informa, enjeñeriu sira ne’e agora daudaun sira hahú fali sira-nia servisu hodi haree projetu sira-ne’ebé seidauk finaliza tanba sira-nia naran tau ona iha kada projetu.
“Foin lalais ne’e funsionáriu servisu iha diresaun PDIM hamutuk na’in sia ne’e asina ona sira-nia kontratu extensaun. Maibé, asina kontratu ida-ne’e polítika autoridade munisípiu Viqueque bazeia ba ezijénsia ne’ebé ami hasoru tanba depois kontratu hotu, ema atu kontrolu projetu laiha,” Domingos de Carvalho Monteiro, hateten ba Agência TATOLI, I.P, resintu administrasaun Viqueque, ohin.
Diretór PDIM viqueque ne’e hatutan, extensaun kontratu ne’e ba fulan tolu; husi janeiru to’o marsu, maibé ba fulan tolu ne’e projetu sira seidauk ramata sei difikulta ba implementasaun projetu ne’ebé agora daudaun sei la’o; kontrola kualidade.
“Kontratu ne’ebé pesoál enjeñeru sira asina ba fulan tolu, maibé ba fulan tolu hotu maka la extende sei prejudika nafatin ba projetu ne’ebé la’o hela. Nune’e depende ba prezidente autoridade foun mai ne’e mak iha kompeténsia extende ka lae,” nia hato’o.
Notísia relevante:https://tatoli.tl/2024/01/30/pdim-viqueque-laiha-pesoal-enjeneiru-hodi-kontrola-projetu/
Nia lembra, antes ne’e PDIM hasoru dezafiu ba pesoál enjiñeru ne’ebé kontratu hotu 31 dezenbru 2023 nune’e tama fulan janeiru 2024 enjiñeru sira labele tuun ba terrenu hodi halo kontrolu ba projetu sira-ne’ebé daudaun ne’e la’o hela.
“Agora enjiñeru sira-nia kontratu asina fali ona ne’ebé sente di’ak tanba bele halo kontrolu ba projetu sira-ne’e hodi ita bele garante ba kualidade,” nia subliña.
Projetu PDIM iha tinan 2023 ne’ebé seidauk finaliza maka hanesan EBF Cailaquebabo, postu Lacluta ho kustu obra $109.908,19, implementa husi empreza MOT-Quim Unip.Lda, rezidénsia administrador ho moru no jardin iha suku Caraubalu, postu Viqueqeu Vila ho kustu obra $470.225,91, responsavel husi empreza Paceful Unip.Lda, armazen ai-moruk iha suku Caraubalu, postu Viqueque Vila ho kustu obra $144.286, implementa husi empreza Belas Lari.
Tuir dadus, pesoal enjeñeiru serbisu iha PDIM ne’ebé extende ona kontratu kompostu husi arkitetu na’in tolu, tékniku sívil na‘in neen.
Jornalista : Vitorino Lopes da Costa
Editór : Rafael Ximenes de A. Belo
