DILI, 16 fevereiru 2024 (TATOLI)–Embaixadór Timor-Leste ba Singapura, Alexandre Vital da Cruz Araújo Tilman, sesta ne’e, hasoru Primeiru-Ministru (PM), Kay Rala Xanana Gusmão, molok desloka bá Singapura halo misaun Estadu, iha segunda (19/02).
Embaixadór haktuir, durante hasoru malu Xefe Governu husu atu kontinua ko’alia ho entidade Singapura nian ligadu ho adezaun Timor-Leste nian ba Asosiasaun Nasaun Sudeste Aziátiku (ASEAN, sigla ingles).
“Rona hosi Primeiru-Ministru prioridade Governu nian saida mak ita-nia misaun Singapura presiza hala’o, nune’e Primeiru-Ministru fó prioridade lubuk ida hanesan kestaun ita-nia adezaun ba ASEAN no iha kooperasaun ita-nian ho Singapura iha área formasaun ba profisionál sira,” Diplomata ne’e relata hafoin hasoru PM Xanana, iha Palásiu Governu.
Notísia relevante : PR Horta fó pose Embaixadór foun na’in-neen
Nia kompromete katak sei halo promosaun no partilla informasaun sira ba investidór Singapura hodi atrai investe iha Timor-Leste.
“Tanba ne’e maka ha’u-nia prioridade sei foku ba ASEAN ho ita-nia kooperasaun hodi bele kontinua apreende hosi Singapura iha área akadémika, formasaun ba ita-nia jestór sira nomós relasaun ekonomiku. Konserteza katak investidór hotu sempre buka oportunidade bainhira oportunidade iha sira sempre mai, no ita-nia misaun iha ne’ebá sempre prontu atu hato’o informasaun saida de’it mak sira presiza. Asegura katak bainhira sira mai karik sira iha ona informasaun ne’ebe loos kona-ba ita-nia lei sira, ambiente komersiu, no potensa ekonomia ne’ebe ita bele oferese”, nia esklarese.
Aleinde ne’e, Embaixadór ne’e hakarak tau-matan ba timor-oan sira iha Singapura, liu-liu sira ne’ebé mak daudaun halo tratamentu saúde.
Durante reuniaun ne’e, Diplomata ne’e agradese ba IX Governu nia konfiasa hodi asume responsabilidade ida-ne’e.
Alexandre Vital da Cruz Araújo Tilman hamutuk ho Embaixadór lima seluk simu pose hosi Prezidente Repúblika, José Ramos Horta, iha loron 12 dezembru 2023.
Jornalista : Antónia Gusmão
Editora : Julia Chatarina
