VIQUEQUE, 16 fevereiru 2024 (TATOLI)-Programa Nasionál Dezenvolvimentu Suku (PNDS) konsellu suku Dilór, postu administrativu Lacluta, Munisípiu Viqueque, loke dalan kilométru 16 hosi postu Lacluta liga ba área Uefia hodi fasilita abitante sira asesu.
Tuir Xefe suku Dilór, Jacinto Ximenes, espresa, programa PNDS ba tinan 2024 programa prioridade ba suku Dilór deside loke dalan ba abitante sira hosi suku Dilór ne’ebé hela iha área Uefia, atu fasilita abitante sira bele asesu ba postu Lacluta no munisípiu.
“Programa PNDS ba tinan 2024 ne’e ami tau períoridade ba loke dalan foun ne’ebé atu liga ba área Uefia. Dalan ne’ebé agora dadaun ami hahú loke ne’e hamutuk kilométru 16. Objetivu atu fasilita ita-nia abitante sira-ne’ebé hela iha Uefia hodi asesu bá postu no munisípiu,” Jacinto Ximenes, hateten ba Agência TATOLI, I.P, iha Postu administrativa Viqueque Vila, ohin.
Jacinto hatutan, dalan husi suku Dilór postu Lacluta ba Uefia hodi sai hanesan alternativu ba abitante suku Dilór ne’ebé hela iha área Uefia, atu asesu tanba dadaun ne’e kondisaun Uelolo sai difikuldade bo’ot ba abitante sira-ne’ebé moris iha área ne’ebá.
“Kuaze tinan haat ona povu sira ne’ebé hela iha área Uefia moris hanesan iha izolamentu nian laran tanba sira atu lori sai sira-nia produtu lokál ba asesu mós ladi’ak, ema fa’an sasán ba área ne’ebá mós ladi’ak liuliu iha tempu udan. Tan ne’e, maka ami suku Dilór deside programa PNDS ne’e loke dalan ba ami-nia povu ne’ebé hela iha Uefia. Nune’e ha’u hanoin katak dalan ne’e sei tulun ita-nia abitante sira no úniku dalan ne’e de’it mak sei bele lori povu Uefia nia produtu bá merkadu no bele asesu ba viajén lokál. Maibé, dalan ne’e iha tempu udan ne’ebé bo’ot, la bele asesu, bainhira ateiru ona ho rai henek no fatuk, automatikamente bele sirkula ona ho di’ak”, nia subliña.
Nune’e programa PNDS regular hodi loke dalan foun kilométru 16 gasta ne’ebé orsamentu hamutuk $48 mil aloka ba ke’e dalan no halo pasadeiras hamutuk neen ne’ebé hahú loke dalan loron 13 fulan fevereiru 2024 no tuir planu sei finaliza iha fulan juñu.
“Maibé kuandu lalais liu sei hotu iha fulan abríl ne’e, ita bele uza ona, projeitu loke dalan ne’e kontrola husi ekipa jestaun suku Dilór no konselu suku. Tamba ita akompaña situasaun reál ne’ebé akontese mota Uelolo mak PNDS regular ne’e Dilor Prevee hodi loke dalan. Projetu PNSD ne’e, ami loke kuotasaun, depois empreza sira tuir kuotasaun nune’e rezultadu husi kuotasaun empreza Yoki Unip Lda Mak sai hanesan fornesedór ekipamentu Pezadu hodi loke dalan,” autoridade lokál ne’e hateten.
Entretantu, progresu loke dalan foun ne’e ke’e ona kilometru tolu husi Dilor to’o ona Aulatar no dalan ne’e rasik sei asesu husi aditante aldeia sira hanesan aldeia Aulatar liga ba Wedau, Matou, to’o iha Ponte Uefia no sei benifísia ba uma-kain totál hamutuk 67 no totál populasaun hamutuk 1000-resin.
Jornalista : Vitorino Lopes da Costa
Editór : Rafael Ximenes de A. Belo
