iklan

NASIONÁL, HEADLINE, INKLUZAUN SOSIÁL

Prezidente INSS sei foku ba prioridade haat durante mandatu

Prezidente INSS sei foku ba prioridade haat durante mandatu

Estrutura Konsellu Administrasaun INSS no Fundu Rezerva Seguransa Sosiál simu pose, iha salaun MSSI, Caicoli, sesta (16/02/2024). Imajen Tatoli/Egas Cristóvão

DILI, 16 fevereiru 2024 (TATOLI)—Prezidente Institututu Nasionál Seguransa Sosiál (INSS), Arlindo Pinto, hateten, nia parte no estrutura sei foku ba prioridade haat durante mandatu.

“Ita-nia planu prioridade mak hanesan harii sentru integradu ba INSS, halo dijitalizasaun integrasaun ba baze dadus, halo jestaun ba pagamentu pensaun sosiál sira, kria lei no harii komité investimentu hodi haree kona-ba kapitalizasaun fundu rezerva sosiál,” Prezidente institutu informa ba Agência Tatoli hafoin serimónia tomada pose estrutura INSS, iha salaun Ministériu Solidaridade Sosiál no Inkluzaun (MSSI), Caicoli, sesta ne’e.

Aleinde ne’e, iha tempu badak sei halo lansamentu portál hodi divulga informasaun ba servisu sosiál sira.

“Durante ne’e institutu halo ona sosializasaun iha liña ministériu hotu, maibé ho rekursu limitadu maka ita kria sistema informasaun ne’ebé sei tau informasaun hotu nune’e públiku bele asesu informasaun hotu,” nia akresenta.

Notísia relevante : PM husu Prezidente INSS ho estrutura serví povu ho domin

INSS nu’udar instituisaun sub setór ne’ebé ho nia natureza serbisu hanesan autonomia administrativa finanseira no patrimóniu rasik, ne’ebé regula tuir artigu 1 dekretu-lei númeru 47/2016 14 dezembru, ne’ebé kria INSS, ho juridikamente medida lubuk ida hodi proteje traballadór ho sira-nia família bainhira lakon rendimentu ne’ebé mai hosi serbisu.

“Iha Timor-Leste ita adota Rejime Jerál Seguransa Sosiál tuir lei númeru 12/2016, 14 novembru, kona-ba rejime kontributivu seguransa sosiál ne’ebé kabe ba ministériu kompetente, liu-liu Ministériu Solidaridade Sosiál no Inkluzaun hodi asegura nia efetividade implementasaun,” Arlindo esplika liuhosi ninia diskursu.

Seguransa sosiál estabelese hodi tulun kondisaun maternidade, paternidade, adosaun, invalidez, veliche no mate.

Ba situasaun hirak ne’e ida-idak tulun sira ajusta tuir natureza no tempu kontribuisaun hosi traballadór sira, ho nia prestasaun ne’ebé oferese hosi seguransa sosiál liuhosi provizaun tolu mak hanesan provizaun ba veliche (pensaun veliche), provizaun ba invalidez (pensaun invalides absoluta, pensaun invalidez relativa), provizaun ba mate (subsidiu mate, ou re-embolsu despeza funerál, pensaun sobrevivénsia).

Hosi tinan 2007-2017, Governu ne’ebé tuituir malu fó prioridade ba asisténsia sidadaun ne’ebé ki’ak no vulnerável liu iha sosiedade Timor.

Enkuantu iha IX Governu Konstitusionál rasik mós sei kontinua fó tulun ba kamada populasaun, liuhosi dezenvolve polítika no kria estratéjia ne’ebé bele redús dependénsia ba apoiu hosi Estadu, inklui konsolida INSS bele jere ho independénsia, transparénsia, efikásia no efisiensia, sistema seguransa sosial, no rejime kontributivu no naun-kontributivu.

Dezenvolve parte tolu

Iha parte seluk, IX Governu Konstitusionál liuhosi MSSI sei dezenvolve INSS foku ba parte tolu hanesan jestaun administrasaun instituisaun seguransa sosiál, jestaun fundu seguransa sosiál, koordenasaun serbisu ho liña ministeriál sira inklui hametin relasaun serbisu ho parseiru dezenvolvimentu sira.

Kona-ba jestaun administrasaun instituisaun seguransa sosiál, desde instituisaun ne’e hamriik, iha jestór lubuk ida ne’ebé troka malu hodi haree jestaun administrasaun ne’e rasik hodi jere finanseiru no planu implementasaun territoriál, atendimentu públiku no privadu, inklui pagamentu ba pensaun sosiál sira.

Ba jestaun fundu seguransa sosiál, Governu hakarak kria baze di’ak ba prestasaun sosiál ba sidadaun tomak, nune’e sei hametin programa asisténsia sosiál liuhosi ajustamentu ba nível asisténsia finanseira tuir nesesidade ne’ebé iha hela, no halo jestaun di’ak liu ba fundu seguransa sosiál hodi asegura nia sustentabilidade ba futuru mai.

“Ita hotu hatene katak seguransa sosiál sai nu’udar kompromisu Governu atu hametin dezenvolvimentu inkluzivu no sustentável,” Prezidente institutu tenik.

INSS no Fundu Rezerva Seguransa Sosiál sei kria lei investimentu hodi halo konsultasaun públika ba estabelesimentu komité investimentu ba fundu rezerva seguransa sosiál no fiskál únika, ho objetivu atu garante sustentabilidade no transparánsia inklui asegura direitu ne’ebé benefisiáriu iha ba tempu naruk.

Antes ne’e, Governu aprova ona akordu rua ho Portugal iha área seguransa sosiál inklui memorandu entendimentu ida kona-ba mobilidade traballadór timor-oan sira, nune’e bele hametin relasaun serbisu ho parseiru dezenvolvimentu sira.

Ida-ne’e hanesan akordu administrativu ida ba implementasaun konvensaun seguransa sosiál Timor-Leste ho Portugal no memorandu kompriensaun ida kona-ba mobilidade traballadór timor-oan sira nian.

Akordu hirak ne’e iha área seguransa sosiál nian sei fó dalan hodi permite sidadaun timor-oan no portugeza sira hetan benefísiu hanesan mai hosi seguransa sosiál hosi nasaun ida-idak.

“Alende ne’e, la’ós de’it ita atu haree ba nasaun ne’ebé traballadór timor-oan iha ba, maibé sei haree mós konvensaun sira seluk hosi nasaun sira ne’ebé iha nia traballadór hala’o serbisu hanesan Inglatera, Koreia Súl, no Austrália,” Arlindo Pinto dehan.

Ministra husu mellora servisu

Ministra Solidaridade Sosiál no Inkluzasaun, Verónica das Dores, ne’ebé fó pose ba Prezidente INSS ho nia membru konsellu administrativu, husu atu serbisu ho profisionál.

“Husu ita hotu nia pasiénsia no kontribui hodi mellora servisu INSS hodi responde ba kondisaun reál povu nian ne’ebé iha tanba ita-nia servisu atu haree sira,” nia hameno.

Estrutura INSS ne’ebé ohin simu pose ba mandatu tinan-tolu (2024-2026) mak hanesan Arlindo Pinto nu’udár Prezidente INSS, Dulce Natividade Fátima da Cunha no Solange de Fátima Borges nu’udar Responsável ba Solidariedade Sosiál, Sansão Gomes Reprezenta Empregadór sira, no Almério Vila Nova Gouveia Reprezenta Traballadór Timor-Leste, ne’ebé sira ne’e hotu nu’udár mós vogál ba Konsellu Adminstrasaun Institutu Nasionál Seguransa Sosiál.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!