COVALIMA, 16 fevereiru 2024 (TATOLI) – Diretór Servisu Munisípal Saúde, Domingos Sequiera, seidauk simu despaixu husi Ministériu Saúde atu koloka pesoál saúde no administrasaun hamutuk 26 ne’ebé estende ona sira-nian kontratu ba postu sira ne’ebé falta rekursu umanu, tanba pesoál sira ne’e asina ona kontratu, iha 23 janeiru, ho durasaun ba tinan ida nian.
Estensaun kontratu ba pesoál saúde sira ne’e ba Programa Malária, Nutrisaun, Tuberkuloze, VIH/Sida, aleinde ne’e mós ba administrasaun ida no motorista ida.
“Ita nafatin hala’o atendimentu klínika movel iha postu saúde ne’ebé laiha pesoál atu atende komunidade sira ”, Domingos Sequeira hatete, ohin.
Hodi hein kolokasaun profisionál saúde sira, dirijente ne’e nafatin orienta funsionáriu ativu sira iha sentru saúde hodi kria oráriu ba atendimentu klínika movel ba populasaun sira iha kada semana iha postu saúde Bulu, Beilaku no Kulu-oan iha Zumalai, iha postu saúde Foho-lulik iha Tilomar no postu saúde Laktos iha Fohorem.
Tuir dadus, pesoál kontratadu iha postu no sentru saúde hamutuk 142 no husi númeru ne’e na’in-99 kontinua kontratu.
Sentru saúde iha Covalima hamutuk hitu ne’ebé kria iha postu administrativu Fatululik, Fatumea, Fohorem, Tilomar, Maucatar, Suai no Zumalai no iha postu saúde hamutuk 24 ho totál pesoál saúde 331, husi númeru ne’e koloka ba sentru no postu saúde Fohorem hamutuk 35, Fatumea 22, Fatululik 22, Maucatar 38, Tilomar 44, Zumalai 43 no Suai 76.
Notísia relevante: Fundu Globál aponta falta rekursu umanu no kondisaun traballu iha sentru saúde Covalima
Jornalista: Celestina Teles
Editora: Maria Auxiliadora
