COVALIMA, 17 novembru 2023 (TATOLI) – Falta rekursu umanu no kondisaun traballu ba profisionál saúde sira iha Covalima sai problema ne’ebé aponta husi Mekanizmu Fundu Globál liuhusi inkéritu ne’ebé halo.
Ba kestaun sira ne’e, Fundu Globál aprezenta ona rezultadu peskiza ba dirijente sentru saúde sira iha postu administrativu hitu, iha munisípiu refere.
“Fundu Gobál hamutuk ho Ministériu Saúde nia knaar mak halo fiskalizasaun no nia rezultadu hatudu katak iha sentru saúde balun menus rekursu umanu, ekipamentu, falta armazein, laboratóriu ba pesoál ne’ebé atu serbisu”, Prezidente Mekanizmu Koordenasaun Nasionál Fundu Globál, Filipe da Costa, informa iha salaun Autoridade Munisípiu Covalima hafoin aprezenta uluk rezultadu ne’e ba autoridade munisipál, iha Sukaer-laran, ohin.
Maski falta rekursu sira, maibé tuir rezultadu peskiza, pesoál saúde sira serbisu di’ak iha terrenu no Fundu Globál kongratula ekipa sira-nian esforsu oinsá bele prevene moras VIH/Sida, Malária no Tuberkuloze iha Timor-Leste, liuliu iha Covalima.
Filipe Costa esplika katak atu kombate moras sira ne’e presiza rekursu, ekipamentu no halo investimentu, tanba dadaun ne’e Fundu Globál, KOICA no seluk tan halo ona investimentu. Aleinde ne’e, nesesita mós autoridade lokál no komunidade nia tulun hodi halo tratamentu, nune’e bele deteta moras ho lais.
“Ami haree, ita sei falta iha rekursu orsamentu no seluk tan. Agora, Fundu Globál mak fó osan, maibé ita tenke ko’alia, nune’e Governu bele aumenta halo investimentu”, sujere.
Notísia relevante: Kombate moras HIV-Malária-TBC, Fundu Global sei apoiu milliaun $15 ba Timor-Leste
Reprezentante xefe Sentru Saúde Tilomar, Domingos da Costa, mós aprezenta katak sentru ne’e falta rekursu umanu, ai-moruk no kondisaun traballu ladún di’ak.
“Ita hatene katak sentru saúde Tilomar rejista pasiente malária”, nia adianta.
Sentru saúde refere rejista, entre jullu no outubru, pasiente ne’ebé afeta malária hamutuk na’in-sia hosi suku Lalawa ho Beiseuk.
Notísia relevante: Servisu Saúde Covalima rejista pasiente malária na’in-sia iha Tilomar
Sentru saúde iha Covalima hamutuk hitu ne’ebé kria iha postu administrativu Fatululik, Fatumea, Fohorem, Tilomar, Maucatar, Suai no Zumalai no iha postu saúde hamutuk 24 ho totál pesoál saúde na’in-331.
Jornalista: Celestina Teles
Editora: Maria Auxiliadora
