DILI, 16 fevereiru 2024 (TATOLI)–Xefe Ekipa Téknika ba Negosiasaun Fronteira Terrestre hosi Gabinete Fronteira Marrítima, Roberto Soares, klarifika katak pontu koordenadu sira ne’ebé maka ekipa tau iha fronteira Naktuka nu’udar baze fundamentál atu defende sidadaun inklui propriedade sira.
Roberto Soares hato’o asuntu ne’e bainhira akompaña Xefe Negosiadór Prinsipál no atuál Primeiru-Ministru, Kay Rala Xanana Gusmão halo aprezentasaun ida iha semináriu ne’ebé organiza hosi Organizasaun Rezisténsia Dewan Solidaritas Mahasiswa Pemuda Pelajar Timor-Timur (DSMPPTT), ho tema ‘Hametin esperítu nasionalismu iha kontestu konflitu delimitasaun fronteira entre Timor-Leste ho Indonézia’, ne’ebé hala’o iha salaun Lalini Larigutu Komisaun Nasionál Eleisaun (CNE), Colmera, sesta ne’e.
“Bainhira ekipa rua (Timor-Leste no Indonézia) ne’ebé akompaña mós hosi militár ita-nian, tékniku no rai-na’in sira, até rai-na’in própriu sira husu ajuda tau pontu koordenadu ne’ebé to’o ohin loron ema sarani ami doutór ba besi-kanu, ami simu ida-ne’e, maibé ami tau pontu koordenadu sira ne’e sai baze fundamentál atubele defende ita-nia povu, inklui sira-nia to’os no natar,” nia esplika.
Parte rua halo diskusaun naruk tebes atu ikus mai pontu koordenadu sira ne’e balun afeta ba to’os no natar karik mak sai hanesan liña finál bele iha tan luta ida atubele kontinua nafatin povu nia direitu ba sira-nia eransa bainhira finaliza ona fronteira ho Indonézia.
“Tanba ida-ne’e mak ita luta atu fó protesaun ba ita-nia povu ne’ebé iha área ida ne’e inklui sira-nia to’os no natar,” nia akresenta.
Notísia relevante : Abitante Naktuka fó fiar bá Xanana luta to’o finaliza fronteira terrestre
Antes ne’e, Roberto Soares mós ko’alia ona iha ámbitu vizita Xefe Governu nian ba iha Oé-cusse katak, estaka la’ós desizaun finál hodi solusiona problema fronteira terrestre.
Pontu ne’ebé antes ne’e ekipa delimitasaun fronteira monta ona iha fronteira Naktuka hamutuk 79, hahú hosi Bokos to’o tasi-ibun parte Naktuka nian.
Xefe Ekipa Téknika ba Negosiasaun Fronteira Terrestre hosi Gabinete Fronteira Marrítima ne’e fó sai katak, to’o agora seidauk to’o faze finál tanba sei iha hela prosesu negosiasaun, hanesan foin lalais Primeiru-Ministru vizita ofisiál bá Jakarta la konsege asina tratadu ne’e tanba iha kestaun fundamentál, ligasaun ba eransa no direitu populasaun sira iha Naktuka nune’e seidauk iha respostam ikus mai parte rua la konsege asina konkordánsia ida.
Jornalista : Antónia Gusmão
Editora : Julia Chatarina
