COVALIMA, 19 fevereiru 2024 (TATOLI) – Alunu sira ho idade husi tinan neen mai kraik hamutuk 1.339 simu ona vasina kontra tétanu no difteria, informa Diretór Servisu Saúde Covalima, Domingos Sequeira.
“Ita-nia pesoál saúde sira kontinua tama-sai eskola sira atu hala’o programa vasina regulár tétanu no difteria ba labarik ho idade tinan neen mai kraik”, Domingos Fátima dehan iha Camnasa, ohin.
Programa imunizasaun ne’e hala’o durante tinan ida no hahú iha fulan-janeiru atu haforsa estudante sira-nian imunidade hodi prevene husi moras tétanu.
Responsavel Servisu Saúde Covalima, Mário Gusmão, relata katak estudante iha postu administrativu neen mak simu ona vasina no sei falta alunu husi postu Fatumea.
Tuir dadus, estudante ne’ebé simu imunizasaun husi postu Fatululik hamutuk 23, Fohorem 38, Maucatar 186, Suai 677, Tilomar 315 no Zumalai 126.
Tétanu mak infesaun aguda no grave ida, kauza husi toxina bacilo tetániku Clostridium tetani, ne’ebé tama iha organizmu husi kanek ka lezaun kulit. La tranzmite husi ema ba ema, maibé liuhusi kontaminasaun kualkér tipu kanek ho esporu baktéria Clostridium tetani, ne’ebé hetan iha meiu ambiente.
Notísia relevante: Estudante tinan neen iha Covalima simu vasinasaun kontra tétanu
Jornalista: Celestina Teles
Editora: Maria Auxiliadora
