iklan

POLÍTIKA

Deputadu CNRT husu BTL, E.P hadi’a sistema fornesimentu bee-moos

Deputadu CNRT husu BTL, E.P hadi’a sistema fornesimentu bee-moos

Imajen/BTL,E.P

DILI, 19 fevereiru 2024 (TATOLI)—Deputadu CNRT, Francisco da Costa, husu ba Bee Timor-Leste Empreza Públika (BTL, E.P) atu hadi’a jestaun sistema fornesimentu bee-moos ba konsumidór ne’ebé kontribui taxa ba Estadu.

Notísia Relevante: Dada bee ilegál, BTL,E.P tesi kotu kanu ba uma-kain 500 

“Iha tinan 2023, BTL, I.P hatun sirkulár ida iha munisípiu sira inklui Dili, atu nune’e ba konsumidór sira bele kontribui selu taxa, maibé realidade sirkulár ne’e ida-ne’e balun kumpre no balun la kumpre,” Deputadu CNRT ne’e levanta liuhosi reuniaun plenária Parlamentu Nasionál, segunda ne’e.

Nia dehan, kunsumidór la kumpre tanba sedu liu BTL, E.P hatun sirkular ne’e antes BTL kuandu eziste.

Lloos ne’e, nia dehan, tun iha terenu hodi haree ba torneira no meteran sira-ne’ebé laiha tiha ona, ne’e presiza fó atensaun hadi’a tiha lai ida-ne’ebé aat no la uza ona.

“Ida-ne’e mak foin hatun sirkulár ne’e, atu nune’e povu bele selu. Tanbá se ita la halo ida-ne’e, iha parte balun mós ita halo diskriminasaun boot, tanba iha medan iha terenu ne’e kanu ka torneira balun iha fatin aas iha kraik. Entaun, ema sira-ne’ebé mak iha kraik hetan bee ne’e sulin arbiru de’it no sira-ne’ebé iha fatin aas defisíl atu hetan bee-moos,” bia dehan.

Nia hateten, maneira ida nu’udar reprezentante povu tun ba iha terenu deteta kestaun ne’e akontese duni, tanba ne’e liuhosi plenária hato’o ba BTL, E.P tenke orienta hadi’a, tanba povu iha konsiénsia atu kontribui duni.

Iha sesaun plenária ne’e, Deputada CNRT Cedelísia Faria dos Santos, hato’o mós preokupasaun kona-ba ponte Nunura nian ne’ebé iha semana kotuk hala’o kontaktu eleitorál iha Maliana, nune’e konkorda ho deputadu sira balun antes ne’e foti bebeik asuntu Mota Nunura nian.

Nia konversa ho komunidade iha área ne’eba ne’e preokupa tebes ho bronjong sira-ne’ebé iha mota nian laiha hotu ona, nune’e husu Governu liuhosi ministériu relevante presiza normaliza hodi mota ne’e bele lao tuir nia dalan, atu labele fó ameasa ba ponte inklui komunidade nia natar.

Iha parte seluk, Deputadu CNRT, Gabriel Soares, hato’o preokupasaun kona-ba kualidade implementasaun projetu komunitáriu konstrui eskola iha Daisumi-Aileu ho orsamentu rihun $97,  nune’e husu Governu atu halo investigasaun.

Entretantu, iha reuniaun plenária segunda ne’e, reprezentante Governu liuhosi Vise Ministru ba asuntu Parlamentár, Adérito Hugo da Costa, la marka prezensa, maibé preokupasaun Deputadu sira-nia parte tékniku rejista hela no sei hato’o preokupasaun sira-ne’ebé foti ba iha ministériu tutela hodi tau atensaun.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!