DILI, 19 fevereiru 2024 (TATOLI)—Deputada PD, Rozenha Fatima, husu Autoridade Inspesaun Fiskalizasaun Ekonómia no Sanitária Institutu Públiku (AIFAESA, I.P) atu halo inspesaun regulár kada fulan ba estabelesimentu komersiál hanesan loza sira hodi kontrola sasán liu prazu.
Notísia Relevante: Inspetór AIFAESA, I.P espera MKAE bele konsidera estende kontratu funsionáriu 118
“Ha’u hakarak ko’alia nafatin sasán liu prazu ne’ebé mak barak ita hetan iha loza sira iha Dili laran. Ha’u rasik hetan kazu ida iha loza ida iha Hudi-Laran ne’ebé hetan sasán liu ona prazu, maibé realidade loza na’in nafatin faan hela liuliu ba hahán hanesan aifuan, ikan, naan karau no boek. Tanba bazea ba peskiza husi UNTL, ha’u akresenta nafatin peskizadór hosi Institutu Politékniku Betano (IPB) katak, em-jerál produtu ai-han naan karau, ikan no boek kontaminadu ho formalin. Ida ne’e, sai ameasa boot ba ita-nia vida no jerasaun foun tuir mai,” Deputada PD ne’e levanta liuhosi reuniaun plenária PN, segunda ne’e.
Membru hosi órgaun lejislativa ne’e, preokupa hosi hahán kontaminadu bele hamosu moras hanesan kankru, ne’eduni husu ba Governu liuhusi ministériu asuntu ekonómia liuhosi Autoridade Inspesaun Fiskalizasaun Ekonómia no Sanitária Institutu Públiku (AIFAESA, I.P) no Tane Konsumidór atu kontrola regularmente kada fulan, ba sasán sira ne’ebé mai hosi rai-li’ur.
Deputadu hosi bankada Governu ne’e preokupa ba mós ba daudaun ne’e menus rekursu umanu iha instituisaun Autoridade Inspesaun Fiskalizasaun Ekonómia no Sanitária Institutu Públiku (AIFAESA, I.P) hodi halo inspesaun iha terrenu, nune’e nafatin husu atu solusiona.
“Até agora funsionáriu hosi AIFAESA, I.P rasik barak mak hapara sira-nia kontratu no seidauk asina kontratu foun,. Entaun, menus funsionáriu mak bele hala’o nia kna’ar atu kontrolu kualidade ka inspesaun merkadu iha terrenu tanba menus funsionáriu,” nia dehan.
Reprezentante povu iha PN ne’e sujere ba parte ezekutivu liuhosi membru Governu hotu katak atu serbisu hamutuk entre liña ministeriál hodi bele responde kestaun ne’e, tanba asuntu saúde públika importante no presiza envolve ministériu barak hanesan Ministériu Koordenadór asuntu Ekonómiku, Turizmu no Ambiente, Ministériu Saúde, Ministériu Komérsiu no Indústria, Ministériu Agrikultura no Peska.
Entretantu, iha reuniaun plenária segunda ne’e, reprezentante Governu liuhusi Vise Ministru ba asuntu Parlamentár, Adérito Hugo da Costa, la marka prezensa maibé preokupasaun Deputadu sira-nia parte tékniku rejista hela no sei enkamiña preokupasaun hirak ne’e ba iha ministériu tutela hodi tau atensaun.
Jornalista : Nelson de Sousa
Editór : Cancio Ximenes
