DILI, 19 fevereiru 2024 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hateten, oknum PNTL ho insiál A ne’ebé tiru membru F-FDTL hosi Komponente Navál korpu Fuzileiru ho naran Abrão do Rêgo Smith iha Likintae domigu (18/2) ne’e nu’udar aktus deskuídu signifika asaun ne’ebé membru PNTL halo ne’e la ho intensaun.
“Konforme informasaun ne’ebé ha’u konfirma ne’e katak membru polísia ne’ebé tiru ita-nia forsa ne’e hanesan aktu deskuídu ida signifika asaun ne’ebé oknum PNTL halo hodi tiru kanek vítima ne’e la’ós ho intensaun,” Falur Rate Laek hateten ba jornalista sira hafoin partisipa seremónia aniversáriu Sentru Instrusaun Komandante Nicolau Lobato ba dala-23, iha CICNL Metinaro, segunda ne’e.
Nia esplika, momentu oknum PNTL ne’e atu tiru pistola ne’e nia se ba iha rai hodi tiru ba iha rai la’ós direita ba direta vítima.
“Tuir informasaun ne’ebé ha’u simu hatudu katak pistola ne’e oknum PNTL ne’e se pistola ba rai hodi tiru ba rai la’ós atu direta ba iha vítima. Maibé, momentu oknum ne’e tiru ba rai depois pistola ne’e fekit mak kona fali vítima. Ne’e la’ós intensaun atu tiru maibé ida ne’e falla tékniku,” nia adianta.
Tenente Jenerál Domingos Raul Falur Rate Laek, hateten, motivu hosi kazu ne’e nia seidauk hatene tanba sá mak mosu nune’e maibé husu hothotu atu hein prosesu investigasaun.
Tanba ne’e, Komandu F-FDTL husu ona ba iha Komisáriu Jerál PNTL atu halo investigasaun didi’ak hodi hatene motivu loloos hosi kazu ne’e.
Notísia relevante:PNTL no F-FDTL halo investigasaun konjunta ba kazu Likintae
“Ha’u husu ba Komisáriu Jerál PNTL atu asegura nia membru ne’e no fó prosesu tuir regulamentu ne’ebé iha. Ha’u husu ba Komisáriu PNTL atu hanorin nia membru sira hodi nune’e labele halo problema tan no ha’u fó orden ba ha’u-nia membru F-FDTL atu labele halo patrullamentu tuun sa’e husik PSIK, J2 no SNI mak la’o hodi akompaña prosesu ida ne’e to’o remata,” Falur haktuir.
Nia subliña, hafoin akontesimentu oknum PNTL ne’e tiru tiha membru F-FDTL ne’e oknum PNTL ne’e nia rasik entrega aan kedan ba iha Departamentu Investigasaun Kriminál hodi submete ba investigasaun.
“Oknum PNTL ne’e husi Unidade Espesiál Polísia nia entrega aan ona ba PSIK hodi rezolve tuir lei ne’ebé iha. No, horseik mós tuun kedan ba iha Kuartel Jerál PNTL, ha’u haree ona oknum ida ne’e no ha’u hakalma kedan situasaun iha fatin ne’ebá no horseik ha’u kontaktu Komisariu Jerál PNTL Komandante PNSIK no Ministru Defeza hodi halo intervensaun ba kazu ida ne’e,” nia afirma.
Jenerál Falur hateten, ho kazu ida ne’e husu ba povu timor -laran tomak katak instituisaun F-FDTL no PNTL hatene rezolve nia problema tanba instituisaun rua ne’e eziste e tinan 20 resin ona no sai ona institusaun ne’ebé maduru ona agora Komandu F-FDTL no PNTL tuur hamutuk iha obrigasaun tuur hamutuk hodi rezolve nia problema.
“Kuandu institusaun rua ne’e maka iha problema Komandu F-FDTL no PNTL tuur hamutuk iha obrigasaun tuur hamutuk hodi rezolve nia problema,” nia dehan.
Entretantu, kazu oknum PNTL ho insiál A ne’ebé tiru membru F-FDTL hosi Komponente Navál korpu Fuzileiru ho naran Abrão do Rêgo Smith iha Likintai ne’e akontese iha domingu (18/2) ne’e oras 3:00 madrugada bainhira vítima atu ba hola paun iha área Likintae nian derepente ema deskoñesidu ho karreta nune’e ho arma tiru vítima nia kotuk laran no vítima monu kedan iha fatin akontesimentu.
Nune’e ho akontesimentu ne’e Polísia Militár to’o kedan iha fatin hodi transporte kedan vítima ba iha Hospitál Nasionál Guido Valadares (HNGV) Dili hodi halo tratamentu intensivu, no oras ne’e dadaun membru F-FDTL vítima refere hetan ona tratamentu iha HNGV.
Hafoin akontesimentu ne’e parte membru Polísia Militár mós ba fali fatin akontesimentu hodi halibur informasaun ba kazu ne’e atu kontinua ba prosesu investigasaun.
Jornalista: Natalino Costa
Editór: Rafael Ximenes de A. Belo
