DILI, 19 fevereiru 2024 (TATOLI) – Ekipa husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) halo ona investigasaun konjunta ba kazu tiru kanek membru F-FDTL husi Komponente Navál ne’ebé akontese iha domingu madrugada iha Likintae, Díli.
Komandante PNTL, Komisáriu Jerál Polísia Henrique da Costa, relata katak Instituisaun Forsa Defeza no Seguransa orienta ona parte Diresaun Nasionál Dixiplina Justisa atu halo prosesu investigasaun atubele hetan desizaun ida justu kona-ba motivu husi kazu ne’e rasik.
”Ha’u husu ba públiku atu labele fó komentáriu negativu uluk katak Polísia tiru forsa, tanba durante ne’e ita iha Polísia no forsa sempre kompleta malu iha servisu apoiu defeza no seguransa nian”, Komisáriu Henrique da Costa hatete iha konferénsia imprensa ne’ebé hala’o iha Kuartél Jerál Caicoli, ohin.
Dirijente Polísia ne’e haktuir katak depois akontesimentu ne’e, nia komunika kedan ba Xefe-Estadu-Maiór Jenerál F-FDTL, Tanente-Jenerál Falur Rate Laek, hodi relata informasaun iha terrenu no Tanente-Jenerál Falur orienta mós superiór sira iha baze atu kontrola membru sira atu hakmatek hodi kontribui ba prosesu investigasaun ne’ebé maka la’o daudaun.
“Nu’udar Komandante Polísia, ita sei la defende buat ida, maibé ita hakarak hatuur katak buat hotu-hotu la’o tuir ninia prosesu, tantu prosesu kriminál ka prosesu dixiplinár nian, ida-idak la’o tuir ninia dalan”, afirma.
Husi okorénsia ne’e, Komandante Henrique admite katak ida ne’e sai mós atensaun ida ba Komando Polísia Nasionál Timor-Leste oinsá atu kontinua orienta no organiza membru sira kona-ba utilizasaun arma, inklui bele halo kontrolu ba arma ne’ebé membru sira uza, nune’e bele fó hanoin nafatin ba membru sira katak arma ne’e nu’udar ekipamentu Polísia nian bainhira uza bele fó risku ba ema nia vida.
Enkuantu membru Polísia husi Unidade Espesiál Polísia (UEP), ajente xefe Polísia LS ne’ebé hakanek membru F-FDTL ho postu diviza kabu husi Komponente Navál ho insiál ADR ne’e, agora detein ona iha sela Komando Polísia Munisípiu Dili hodi submete ba prosesu inkéritu. Ba membru F-FDTL ne’ebé hetan kanek ne’e halo ona tratamentu intensivu.
Tuir kronolojia, kazu ne’e akontese iha madrugada tuku 05 bainhira LS hasoru joven na’in-rua tula malu ho motór la kumpre regra sinál tranzitu nian. LS tenta fó hanoin ba sira katak sira viola regra, maibé la konsege tanba sira halai liu tiha, entaun LS kontinua ho ninia transporte hala’o nafatin viajen mai to’o iha Likintae, suku Lahane Orientál maka joven na’in-rua ne’e tuir tan mai no sira hasoru malu iha fatin ne’ebá hodi provoka LS, maka nia hasai pistola hodi tiru adverténsia ba leten hodi fó atensaun ba joven rua ne’e katak nia membru Polísia, depois nia tiru tan ba alkatraun maka bala musan haksoit sa’e hodi kona ADR ninia sorin no ulun.
Husi akontesimentu ne’e família lori kedan vítima ba ospitál hodi hetan tratamentu. Husi okorénsia ne’e maka foin hatene katak vítima ne’e membru F-FDTL husi Komponente Navál.
Depois ida ne’e, membru Polísia LS mós dezvia ninia aan husi fatin refere no entrega aan ba Polísia iha tuku 10 dadeer iha Komando Jerál parte Investigasaun Kriminál nian no parte investigasaun komunika kedan ho prokuradór hodi hetan orientasaun ba prosesu investigasaun. Prosesu ne’e rasik rejista ho númeru kriminál 040/2024.
“Ita hein orientasuan husi Ministériu Públiku bainhira maka ita bele aprezenta ba Ministériu hodi prosesa tuir lei ne’ebé vigora”, komisáriu afirma.
Notísia relevante: Membru F-FDTL ida hetan tiru hosi ema deskoñesidu
Jornalista: Tomé Amado
Editora: Maria Auxiliadora
