DILI, 18 fevereiru 2024 (TATOLI)-Membru FALINTIL Forsa Defeza Timor-Leste (F-FDTL) ida hosi Komponente Navál hetan tiru hosi ema deskoñesidu iha área Likintae, Suku Lahene Orientál, Postu administrativu Vera Cruz, Munisípiu Dili.
Kazu ne’e akontese iha domingu (18/2) ne’e, tuku 3:00 madrugada bainhira vítima atu ba hola paun iha área Likintae nian derepente ema deskoñesidu ho karreta nune’e ho armas tiru vítima nia kotuk laran no vítima monu kedan iha fatin akontesimentu.
Nune’e ho akontesimentu ne’e, Polísia Militár to’o kedan iha fatin hodi transporta kedan vítima ba iha Hospitál Nasionál Guidu Valadares (HNGV), Dili, hodi halo tratamentu intensivu, no oras ne’e daudaun membru F-FDTL vítima refere hetan ona tratamentu iha HNGV.
Hafoin akontesimentu ne’e, parte membru Polísia Militár mós ba fali fatin akontesimentu hodi halibur informasaun ba kazu ne’e atu kontinua ba prosesu investigasaun.
Komandante PNTL Munisípiu Dili, Superintendente Xefe Polísia, Orlando Gomes, hateten, Komandu PNTL Dili simu informasaun kona-ba membru F-FDTL ida hetan tiru hosi ema deskoñesidu iha área Likintae.
Enkuantu ba kazu ida ne’e seidauk hatene motivu loloos tanbasá maka membru F-FDTL hetan tiru tanba sei iha hela prosesu investigasaun.
“Ha’u rona ona informasaun ida ne’e iha ohin madrugada, maibé kazu ida ne’e iha ona prosesu investigasaun. Sira (Departementu Investigasaun Kriminál Nasionál) mak ka’er ona kazu ida ne’e,” Orlando Gomes informa ba jornalista TATOLI via telefónika domingu ne’e.
Jornalista: Natalino Costa
Editór: Rafael Ximenes de A. Belo
