Komandu F-FDTL prosesa ona oknum F-FDTL ne’ebé halo agresaun fízika iha Likisá
DILI, 06 Novembru 2026 (TATOLI)–Xefe Estadu Maiór Jenerál FALINTIL- Forsa Defeza Timor-Leste, Tanente Jerál Domingos Raul ‘Falur Rate Laek’, informa, oknum F-FDTL ne’ebé suspeitadu halo agresaun fízika ba abitante ruma iha Likisá, daudaun ne’e prosesa ona tuir lei ne’ebé vigora.
“Ne’e prosesu tuir lei ne’ebé vigora ne’e, ami tenke fó pozisaun hola medida administrativa maski sira haruka bá Tribunál para hatan, ita hotu iha lei nia okos,” Tenente Jenerál Falur hateten ba jornalista sira iha nia knaar fatin, Kuartel Jenerál F-FDTL, Sesta ne’e.
Notisia relevante : Ofisiál Superiór PNTL ida suspeitadu halo agresaun fízika hasoru Filomena Soares
Nia informa, horisehik Ministra Solidariedade Sosiál no Inkluzaun Verónica das Dores mós hato’o ona kona-ba asuntu referida.
“Ne’e prosesu la’o ona, la’ós ne’e de’it balun iha tan, horisehik Ministra Solidariedade Sosiál no Inkluzaun mós mai iha forma ha’u, dehan forsa sira balun ezersísiu iha tesik ba ne’ebá la fó koñesimentu breve ba komunidade, ne’ebé ohin ha’u haruka investiga no halo relatóriu, maibé ita bele hola medida, saida mak ita bele halo,” nia relata.
Falur mós husu ba membru sira katak bainhira iha naksalak ruma buka atu rezolve hodi hetan solusaun.
“Mensajen sira ne’e kontein ema hotu-hotu ne’ebé vítima, ida-ne’ebé autór ba vítima sira ne’e hotu tenke tau iha nia fatin, problema akontese ne’e hanesan buat ida karik foer ida iha ita buka para rezolve problema ne’e tuir prosedimentu no legalidade sira ne’ebé iha mak ita kontribui halo solusaun ba problemas,” nia fó -hanoin.
Jornalista : Natalino Costa
Editora : Julia Chatarina
