Ró Patrullamentu Militár Jako no Betanu seidauk bele halo operasaun iha Tasi Kosta Súl
DILI, 10 Novembru 2026 (TATOLI)–Xefe Estadu Maiór Jenerál Forsa Armada, Tenente Jenerál Domingos Raul ‘Falur Rate Laek’, informa, Ró Patrullamentu Militár Jako no Betanu seidauk bele halo operasaun iha Tasi Kosta Súl tanba sei hein halo pontu apoiu Navál molok halo operasaun.
“Sira agora iha faze adaptasaun tanba mudansa barak motór depois afeta ba nia sistema eletrisidade no bee, entaun sira tenke adapta neneik hanesan motór (rodajen) lai, kuandu kilómentru to’o mill hira, operasionál kuandu to’o ona standar, entaun sira bele halo misaun kompletu iha Navál,” Falur hateten ba jornalista sira hafoin simu vizita kortezia husi nia omólogu Xefe Forsa Defeza Royal Tailándia, Jenerál Ukris Boontanondha iha Fatuhada, Tersa ne’e.
Notísia relevante : Empreza Xina hahú hikas manutensaun ba Ró Militár Betanu
Nia dehan, Ró Militár rua ne’e daudaun provizóriu halo hela operasaun iha Tasi parte Norte.
“Halo patrullamentu iha kosteira parte Norte, Ataúru depois bá Oekusi depois sira sei bá Com. Agora Súl ne’e sira atu bá tenke buat ida bolu pontu apoiu Navál tenke iha, tanba ne’e mak planu para halo iha fatin ne’ebé parte Súl ne’ebá estudu tama ona Betanu para kuandu nia halo patrullamentu nia tenke sa’e lalais,” nia akresenta.
Governu aloka osan hamutuk millaun $5 iha Orsamentu Jerál Estadu (OJE) 2026 atu halo manutensaun ba Ró Patrullamentu Militár Jako no Betanu.
Manutensaun ba ró rua ne’e inklui troka motór sira-ne’ebé estraga ona, hadi’a parte ró ne’ebé estraga no hadi’a sistema sira-ne’ebé la funsiona ho di’ak, nune’e ró bele halo fali operasaun.
Ró Militár Betanu no Jako mak ró patrullamentu ne’ebé Timor-Leste sosa husi Xina iha tinan 2010, ho kustu millaun $28, ba apoia Komponente Navál halo patrullamentu iha tasi no protesaun ba soberania marrítima nasionál.
Jornalista : Natalino Costa
Editora : Julia Chatarina
