Tailándia hato’o prontidaun asina kuadru kooperasaun militár iha tinan oin
DILI, 10 Novembru 2026 (TATOLI)–Xefe Estadu Maiór Jenerál Forsa Armada Timor-Leste, Tenente Jenerál Domingos Raul ‘Falur Rate Laek’ hetan vizita kortezia husi Xefe Forsa Defeza Royal Tailándia, Jenerál Ukris Boontanondha.
Iha hasoru malu ne’e, líder sira ne’e ko’alia kona-ba kooperasaun militár ne’ebé país rua sei asina iha Fulan-Marsu tinan oin.
“Prioridade liu buat barak hanesan asuntu militár sira-nia disponibilidade atu apoia aplika ligasaun sira. Ohin ha’u mós aprezenta ba Jenerál, ha’u-nia omólogu kona-ba eventu barak ne’ebé ita-nia militár tuir ho sira no aprezenta treinamentu ne’ebé ita hamutuk ho sira iha sira-nia fatin treinamentu,” Falur hateten ba jornalista sira hafoin simu vizita kortezia iha Fatuhada, Tersa ne’e.
Notísia relevante : Xanana hasoru eis-militár Tailándia, antigu membru misaun manutensaun pás iha Timor-Leste
Iha hasoru malu ne’e, Tenente Jenerál Falur Rate Laek, apresia ho Tailándia nia kapasidade prestíjiu ba manutensaun pás, liliu iha mundu parte enjiñaria ne’e sai hanesan motivasaun ba Forsa Armada Timor-Leste.
“Husu sira-nia apoiu atu halo buat sira ne’e la’o di’ak liután, ha’u mós ohin bele sensibiliza ba sira para sira fó hatene sira-nia Governu asina akordu kuadru kooperasaun nível defeza para ita bele halo serbisu di’ak. Kuadru kooperasaun ne’e foku liu ba injeñaria orientál, ne’e foku liu ba formasaun ba ema. Mas eventu barak mak ita atu haruka ita-nia ema bá sira-nia rai,” nia akresenta.
Jenerál Falur haktuir, ba kestaun ne’e Jenerál Forsa Defeza Royal Tailándia hato’o posizaun di’ak tebes.
“Sira-nia posizaun iha abertura sira prontu para ajuda ita depois sira ligadu liu ho ita-nia istória. Tanba Jenerál ne’e mós uluk mai halo misaun operasaun pás iha Timor-Leste mós nu’udar Komandante kompañia iha Vikeke,” nia haktuir.
Durante estadia iha Timor-Leste, Jenerál Ukris Boontanondha sei bá vizita sentru operasaun apoia ba pás iha Metinaru no aban mós sei vizita komponente Terrestre iha Baukau atu bele investe iha modelu saida mak Timor-Leste presiza kona-ba peace keeping force ba apoiu umanitáriu.
“Tanba Timor-Leste atu halo ida-ne’e uma das coisas kritériu ida orbainhira sira haree no apoia ita mak tenke iha kuadru kooperasaun tanba kilat hanesan viatura mós ita hanesan, ne’ebé ita posibilidade di’ak kuandu sira asina ona ne’e ita bele serbisu hamutuk di’ak liu tan,” Tenente Jenerál tenik.
Nia konsidera, akordu ne’e importante tanba Timor-Leste nu’udar nasaun membru ASEAN, ne’ebé aban bainrua presiza haforsa kooperasaun ho nasaun seluk tan hodi serbisu iha área barak no la izoladu.
“Ohin sira manifesta sira-nia disponibilidade bele iha kuadru kooperasaun ho ita tanba foin daudaun ita-nia Primeiru-Ministru mós bá halo ona vizita iha sira-nia rai no dehan Marsu ne’e sira asina ona kooperasaun ne’e,” nia subliña.
Jenerál Falur dehan, Komandu F-FDTL mós sei haruka militár sira hodi tuir ezersísiu hamutuk ho Militár Tailándia.
Jornalista : Natalino Costa
Editora : Julia Chatarina
