Xina hahú konstrui Ospitál Militár iha tinan oin
DILI, 06 Novembru 2026 (TATOLI)–Ministru Defeza, Kontra Almirante Donaciano do Rosário da Costa Gomes ‘Pedro Klamar Fuik’ informa, Xina komprometidu iha tinan oin atu hahú konstrui Ospitál Militár (Ospitál Amizade Timor-Leste no Xina) iha besik Ministériu Defeza no Kuartél Jenerál F-FDTL iha Fatuhada.
“Relasiona ho durasaun ne’ebé mak ita-nia maluk Xina sira fó mai ita mak Ospitál de Amizade, konforme akordu ne’ebé mak establesidu dezeñu prelemináriu kompleta tiha ona, sira agora finaliza dezeñu iha tinan ne’e. Fulan-Fevereiru ou Marsu tinan oin sira hahú,” Ministru Klamar Fuik hateten ba jornalista sira hafoin simu vizita kortezia husi Embaixadór Fransa ba Indonézia, Timor-Leste no ASEAN, Fabian Penone iha Ministériu Defeza, Fatuhada, Sesta ne’e.
Notísia relevante : Konsellu Ministru aprova Komisaun Interministeriál ba Monitorizasaun Projetu Konstrusaun Ospitál Militár
Governante ne’e dehan, ospitál ne’e sei fó asisténsia ba militár sira no povu.
“Ospitál ida ne’ebé mak modernu, ita sei iha ospitál ida-ne’ebé di’ak, la’ós ba militár sira, mas ba mós populasaun hotu,” nia akresenta.
Governu Xina oferese millaun ¥162, ne’ebé ekivale ba millaun US$20-resin ba implementasaun konstrusaun Ospitál Militár.
Ospitál Amizade Timor-Leste-Xina sei hametin kapasidade operasionál F-FDTL nian, komplementa Servisu Nasionál Saúde nian, hadi’a resposta ba emerjénsia no kontribui ba reforsu kapasidade nasionál iha área saúde, ba benefísiu Forsa Defeza no populasaun ein-jerál.
Jornalista : Natalino Costa
Editora : Julia Chatarina
