DILI,19 fevereiru 2024 (TATOLI)—Prezidente Komisaun Permanente Rekrutamentu ba Kontratadu iha Ministériu Saúde, Julio do Santos, informa, iha fulan marsu ne’e, MS koloka ona profisionál Saúde ba fasilidade saúde iha Munisípiu hotu atu halo atendimentu ba populasaun sira.
“Servisu Munisípal ita entrevista hotu ona iha sesta semana kotuk, no husi ne’e, ita prepara dokumentu sira, ita hasa’e ba Ministra Saúde hodi hetan aprovasaun hanesan ha’u hatete ona, totál kandidatura ka ema ne’ebé presiza atu aprova maka 836 pesoas maka tenki ba iha Munisípiu hotu inklui RAEOA, ne’ebé iha loron 1 fulan marsu ita tenke entrega ona ba diresaun ida idak nian, hodi halo ona servisu,” Julio do Santos ba Jornalista iha INFPM Kampo Alor, ohin.
Nia esplika, antes ekipa júri hato’o dokumentu ba Ministra Saúde hodi hetan aprovasaun, ekipa refere, sei halo selesaun ikus ba kandidatu sira-nia valór mak hanesan, selesaun dokumentu, vestuáriu ka roupa ne’ebé sira hatais iha prosesu entrevista, komunikasaun entre kandidatu sira ho ekipa júri, no ikusliu maka sira-nia resposta husi ba ekipa júri.
“Kandidatu sira ne’e, maioria priense ona rekezitu. Ita hein entrega dadus ba Ministra Saúde atu hetan aprovasaun nune’e ita koloka ona ba sentru saúde sira ne’ebé presiza sira-nia prezensa iha ne’ebá,” Julio dehan.
Nia afirma, daudaun ne’e Ekipa Júri hala’o hela entrevista ba kandidatu sira ne’ebé aplika ba iha servisu sentrál nian durante loron rua, no espera iha semana oin sei finaliza.
“Ha’u-nia mensajen ba kandidatura ka pesoál ne’ebé karik pasa, ha’u hanoin sira mós hatene ita-nia prezensa ba atu halo saida; la’ós ita ba atu liman tau ba bolsu atu haruka fali ema lae, ita ba atu sai servidór ne’ebé di’ak. Entaun, ita mós tenke hatudu ita-nia vontade servisu ne’ebé di’ak,” nia hato’o.
Iha sorin seluk, Ministra Saúde, Elia dos Reis Amaral informa, iha fulan-marsu 2024, MS sei halo tan rekrutamentu bá pessoál saúde sira ho bazea bá rezolusaun Governu nian oinsá bele lori pakote integradu saúde ne’ebé sei involve entidade hotu-hotu, liu-liu bá iha parte instituisaun kada Ministériu nian hodi foka oinsá lori servisu saúde bá iha komunidade.
“Ho ida ne’e maka, pessoál saúde voluntáriu ita sei halo rekrutamentu, provavelmente iha marsu nia laran, maibé seidauk bele determina loron. Maibé, ita sei koloka depende bá rezultadu hosi alokasaun primeira-faze depois ita sei hahú fali segunda faze,” Elia Amaral garante.
Planu MS nian ida ne’e atu responde bá Planu Estratéjiku Dezenvolvimentu Nasionál (PEDN) 2011 to’o 2023 bá seitór saúde nian hosi tinan 2011 to’o 2030, kada sentru no postu saúde sira, tenke iha ona médiku espesialista ida, médiku jerál ida, emfermeiru ka enfermeira ida, ho saúde públiku ida.
Tuir Programa Governu Konstitusionál da-sia, programa ba MS liga ho rekursu umanu, iha pontu balun mensiona hanesan tuirmai:
- Kontinua kria kondisaun atu Postus Saúde hotu-hotu bele iha médiku ida (1), enfermeiru rua no parteirasrua;
- Kontinua kria kondisaun atu aldeia hotu-hotu, iha fatin sira ne’ebé la’o liu oras ida hodi to’o iha Postu Saúde, bele iha asesu ba profisionál Saúde ida ne’ebé kompetente;
- Kontinua investe atu hadi’a kompeténsia profisionál no kapasidade téknika ba rekursu umanu no profisionál iha setór de Saúde, hodi fó formasaun ne’ebé adekuada ba kuadru superiór, médiu no báziku;
- Estimula parseria ho kooperasaun internasionál, hodi forma no kapasita profisionál saúde, hahú husi profisionál Saúde espesializadus to’o tékniku ho rekursu umanu seluk, iha setór saúde (nune’e mós iha área administrasaun, jestaun, finansa, aprovizionamentu no kontabilidade);
- Implementa planu kona-ba forsa laborál, kuadru pesoál, regulamentu no padraun ho kódigu konduta ba profisionál iha setór saúde.
Iha tinan 2024 ne’e, orsamentu ba MS hamutuk 67.600.906 ba programa tolu hanesan Funsionamentu no dezenvolvimentu institusionál, kuidadu saúde primária no mós kuidadu saúde sekundáriu no tersiáriu.
Notísia relevante:Ekipa júri entrega tan kandidatu 82 ba SNAEM, I.P, “Servisu ho profesionalizmu”
Jornalista : Felicdade Ximenes
Editór: Rafael Ximenes de A. Belo
