iklan

HEADLINE, SAÚDE

Ekipa júri entrega tan kandidatu 82 ba SNAEM, I.P, “Servisu ho profesionalizmu”

Ekipa júri entrega tan kandidatu 82 ba SNAEM, I.P, “Servisu ho profesionalizmu”

Ekipa júri entrega tan kandidatu 82 ba SNAEM, I.P. Imajen Tatoli/Felicidade Ximenes

DILI, 08 fevereiru 2024 (TATOLI)—Ekipa júri, ohin, entrega tan kandidatu na’in 82 ba Servisu Nasionál Ambulánsia no Emerjénsia Médika (SNAEM, I.P), hodi hala’o servisu atendimentu públiku iha Timor-Leste (TL), Prezidente Komisaun Permanente Rekrutamentu ba Kontratadu iha Ministériu Saúde, Julio dos Santos, informa.

“Iha semana kotuk ita entrega uluk 229 profisionál saúde ba Hospitál Nasionál Guido Valadares no ohin ita entrega tan kandidatu 82 ba SNAEM, I. P atu nune’e sira bele hala’o servisu tuir nesesidade populasaun nian iha ita-nia rain,” Julio do Santos informa ba jornalista sira bainhira entrega kandidatu ba SNAEM.IP iha salaun INFPM Kampu Alor, kinta ne’e.

Nia esplika, husi 82 ne’e balun servisu iha sentrál no mós balun koloka ba SNAEM.IP munisípiu sira, nune’e hodi bele hala’o atendimentu ba populasaun sira.

“Husi sira ne’e mai husi enfermeriu, motorista ambulánsia, administrasaun, mekániku sira ne’ebé mak atu servisu iha ró ambulánsia, entaun ita entrega ona nune’e sira bele hala’o ona sira-nia servisu ida ne’e ba oin,” nia esplika.

Notísia relevante:Ekipa juri hahú entrevista kandidatu profisionál saúde ne’ebé liu selesaun dokumentu

Iha fatin hanesan, Diretór Nasionál SNAEM, I.P, Simplicio Amaral de Deus, husu ba kandidatu sira hotu, tenke servisu ho profisionalizmu nune’e bele halo atendimentu di’ak ba populasaun sira iha Timor-Leste.

“Ha’u husu agradese ba prezidente júri no nia ekipa tomak ho ita-boot sira-nia servisu no dedikasaun, sakrifísiu. Ita-boot sira bele realiza servisu ida ne’e, ho nune’e husu ba admitidu/admitida sira  ne’ebé  mai atu servisu iha SNAEM,I.P  mak  presiza servisu ho profisionalizmu  atu nune’e   bele halo atendimentu di’ak ba ita-nia populasaun,” Simplicio Amaral de Deus husu.

Ezekutivu ne’e subliña, servisu iha SNAEM.I, P tenke ho pontualidade mak respeitu, valoriza prinsípiu lei funsaun públika nian.

“Ida ne’e mak importante ba ita-boot sira. La bele utiliza instituisaun Governu hanesan ita-boot sira-nia empreza unipesoál Lda  hodi mai servisu tuir ita-boot sira-nia hakarak, entaun ida ne’e kontra ona valr ita-nia nasaun nian,” nia afirma.

Tanba ne’e, autoridade SNAEM, I.P ne’e husu ba enfermeiru sira bainhira evakua pasiente sira husi munisípiu mai iha nasionál tenke akompaña pasiente iha karreta laran nune’e bainhira pasiente presiza atendimentu ruma tenke atende ho lalais. Labele tuur fali iha karreta oin husik pasiente mesak iha karreta laran ida ne’e la di’ak.

“Se ita-boot sira tuur tiha kareta ambulánsia oin mak pasiente hetan buat ruma iha karreta kotuk  hanesan soru maran, balun iis la iha ona no balun ran sai husi kanula ida ne’e responsabilidade ita-boot sira nian, tanba superiór sira fó ona servisu ita-boot sira atu ezekuta iha terrenu, maibé ita-boot sira ezekuta seluk fali, bainhira sira prosesa ita-boot sira ba iha tribunál, ita-boot sira mak responsabilidade.  Entaun, ida ne’e ha’u atensaun maka’as ba ita-boot sira atu haree ba ida ne’e,” nia enkoraja.

Notísia relevante:Padre Joanico: Pesoál saúde tenke atende pasiente ho fuan

Jornalista: Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!