Ekipa juri hahú entrevista kandidatu profisionál saúde ne’ebé liu selesaun dokumentu
DILI, 30 janeiru 2024 (TATOLI)–Ekipa juri ba rekrutamentu profisionál saúde ba sentru saúde komunitaria hanesan médiku, enfermeira no parteira ba iha munisipiu sira hahú ohin (segunda, 29 janeiru 2024) halo entrevista ba kandidatu ne’ebé liu selesaun dokumentu iha Institutu Nasionál Farmácia no Produtu Medikamentu iha Kampung Alor.
Notísia Relevante: Don Virgílio Kardeál husu MS rezolve problema hapara profisionál saúde
Preizdente juri, Júlio dos Santos, hateten bazea ba despaixu Ministra Saúde, ekipa juri fahe rekrutamentu ba etapa primeiru ba Hospital Nasionál Guido Valadares ema hamutuk 1229, ema 74 ba Servisu Nasionál Ambulánsia no Emerjensia no 154 ba sentru saúde sira iha munisipiu hotu.
“Ohin ita hahu tan faze entrevista ba profisionál servisu saúde komunitaria ba munisipiu sira atu responde ezijensia komunidade ka nia presiza. Ita presiza rekruta profisionál saúde 154 ba sentru saúde sira iha Timor laran tomak,” Julio dos Santos hateten ba jornalista sira iha Kampu Alor.
Ekipa juri komesa ona faze entrevista ba kandidatu vaga ba sentru saúde sira hosi munisipiu Baucau, depois sei kontinua ho munisipiu sira seluk.
Profisionál saúde sira-ne’ebé aplika vaga ne’e hamutuk 1.749 mak konkore ba vaga sira-ne’e, tanba ne’e prosesu sei la’o hela.
Kriteriu sira ba konkorente sira konkore ba vaga ne’e mak hanesan kandidatu iha rekerimentu mai iha Ministériu Saúde, iha kurikulu vitae, sertifikadu ka diploma, billete identidade ka kartaun eleitorál, rezidénsia permanente no hatama fotografia.
Ministériu Sáude sei koloka ema na’in-11 ba iha kada sentru saúde hodi bele atende pasiente sira loro-loron.
“Ita tau ema na’in 11 ba kada sentru saúde maibé kunadu pasa ona entrevista, ita entrega ba diretó munisipál sira hodi haree mapeamentu kona-ba menus profisionál saúde sira, sira mak haree mapameantu,” nia dehan.
Ekipa juri fó oportunidade ba reklamante sira
Preizdente juri, Júlio dos Santosa, husu ba kandidatu ba vaga ne’ebé hakarak halo reklamasaun, bele aprezenta ba ekipa juri atu hato’o sira-nia ezijénsia ba vaga.
“Dala ruma mosu fallansu ki’ik sira iha, karik balun naran la sai, sira bele mai halo reklamasaun katak ami aplika vaga ne’e maibé ami naran la sai. Ida-ne’e, ita hakarak hato’o ba públiku,” nia apela.
Nia konsidera públiku nia protestu no reklamasaun hatudu katak ida-ne’e mak nasaun demokrátiku ne’ebé ema hotu-hotu iha direitu atu fó sujestaun no krítika konstrutiva.
Jornalista : Jesuína Xavier
Editór : Cancio Ximenes
