Loron Finadu, Padre Paulos: “orasaun no hahalok di’ak bele tulun klamar sira”
DILI 02 Novembru 2026 (TATOLI)—Padre Paulos Maia, konsidera Loron Finadu ne’ebé kada tinan selebra iha loron 02 Novembru sai tempu espesiál ba sarani sira atu reza ba klamar sira ne’ebé iha hela purgatóriu.
“Responsabilidade atu reza ba matebian sira la limita de’it ba loron 02 Novembru, maibé tenke kontinua iha moris loroloron. Husu ba sarani sira atu la’os reza de’it, maibé moris tuir hahalok di’ak, tanba orasaun no hahalok di’ak bele tulun klamar sira. Ita-nia orasaun bele tulun sira, maibé ita tenke mós komporta ho di’ak,” Padre Paulos hateten iha nia omília bainhira prezide Misa Finadu ne’ebé halo Igreja Katedrál Dili, Segunda ne’e.
Nia konsidera Loron Finadu sai tradisaun importante ba sarani Timor-Leste atu hanoin matebian sira.
“Selebrasaun Loron Finadu ne’ebé selebra kada dia 02 Novembru sai ona tradisaun importante atu hanoin no reza ba maluk matebian. Hanesan sarani no sidadaun Timor-Leste, ema hotu iha responsabilidade atu komemora no hanoin matebian sira kada tinan,” Amu subliña
Notísia relevante : Lian husi memória ne’ebé la nahas: Finadu, saudade no legadu husi sira ne’ebé ba ona eternidade
Padre Paulos dehan, tuir orientasaun Papa Bento XIV, iha Loron Finadu sarani sira bele selebra misa tolu ho intensaun diferente.
“Primeira misa ita reza ba matebian hotu, sarani ka lae. Segunda misa ba sarani sira, no terseira misa ba ita-nia família sira,” nia esplika.
Iha biban ne’e, Padre Paulos husu ba sarani sira tenke fiar katak matebian sira iha Maromak nia oin bele reza ba ema sira ne’ebé sei moris iha mundu.
“Sarani sira atu kontinua hasa’e orasaun no halo misa ho intensaun ba matebian sira hodi hametin relasaun espirituál entre Igreja Peregrina no matebian. Sarani sira atu hametin fiar no esperansa iha Maromak nia Mizerikórdia,” nia subliña.
Tuir observasaun Jornalista Ajénsia TATOLI iha kapitál Dili iha ámbitu selebrasaun Loron Finadu, movimentu transporte la hanesan tempu baibain, estrada sira mamuk no iha ambiente hakmatek nia laran.
La’ós de’it movimentu transporte maka la sirkula bá-mai, maibé loja boot sira iha kapitál Dili taka provizóriu.
Nune’e mós, Polísia sira halo seguransa másimu iha Semitériu Santa Krús no Bekusi hodi fó seguransa ba sarani sira ne’ebé tau ai-funan iha rate no organiza transporte hodi labele hamosu engarafamentu.
Jornalista : Natalino Costa
Editora : Julia Chatarina
