Fundu Mina-Rai rejista balansu billaun $18,06 iha trimestre datoluk 2026
DILI, 09 Novembru 2026 (TATOLI)-Banku Sentrál Timor-Leste (BCTL, sigla portugés) fó aprezenta relatóriu kona-ba Fundu Petrolíferu ba trimestre datoluk, ne’ebé taka iha 30 fulan Setembru 2026. Dokumentu ne’e hatudu katak kapitál Fundu Mina-Rai nian iha trimestre ne’e hamutuk billaun $18,06, tun kompara ho billaun $18,43 iha trimestre daruak 2026.
Diretór-Ezekutivu Departamentu Jestaun Fundu Petrolíferu iha BCTL, Tobias Ferreira, esplika katak, tuir Lei Fundu Mina-Rai, Ministériu Finansa mak determina estratéjia investimentu, enkuantu BCTL maka halo jestaun operasional ba fundu.
Nia hatutan katak relatóriu ne’e mós hatudu totál reseita ne’ebé Fundu Mina-rai simu durante trimestre datoluk hamutuk millaun $4,64.
Iha parte seluk, rendimentu brutu husi investimentu rejista valór millaun negativu $69,70. Montante ne’e kompostu husi millaun $143,92 ne’ebé mai husi jurus, kupon no dividendu, no millaun $213,62 ho rezultadu negativu husi valorizasaun merkadu finanseiru.
“Entaun, rendimentu brutu husi investimentu hamutuk millaun negativu $69,70, ne’ebé ekivalente ho rendimentu karteira nian negativu 0,62%, kompara ho ninia índise referénsia negativu 0,62%”, Tobias Ferreira hatete.
Nia subliña katak iha trimestre datoluk, totál osan ne’ebé hasai husi Fundu Mina-Rai hamutuk millaun $301,89, ne’ebé transfere ba Konta Tezouru atu finansia Orsamentu Jerál Estadu, no millaun $3,88 seluk uza ba kustu jestaun investimentu.
Dezde estabelesimentu Fundu Mina-Rai, totál reseita ne’ebé akumula ona hamutuk billaun $25,30, enkuantu rendimentu investimentu iha merkadu finanseiru hamutuk billaun $13,58, ho média rendimentu anual 4,74%. Totál levantamentu ne’ebé transfere ona ba Orsamentu Estadu hamutuk billaun $19,96.
Notísia relevante: Governadór BCTL aprezenta dezempeñu fundu petrolíferu-revizaun ekonómika ba KM
Jornalista: Arminda Fonseca
Editora: Maria Auxiliadora
