Sentru Solidariedade Covalima distribui foos saku 399 ba família vulneravel
COVALIMA, 19 fevereiru 2024 (TATOLI) – Sentru Solidariedade Sosiál no Inkluzaun (SSSI) Covalima disponibiliza foos saku 399 ba família vulneravél no instituisaun solidariedade sira iha Covalima.
Diretór SSSI Covalima, Agapito Assis Cardoso, hatete apoia foos ne’e tanba sentru simu proposta husi autoridade no instituisaun ne’ebé presiza tebes.
“Ministériu Solidariedade Sosiál no Inkluzaun iha polítika distribui foos ba munisípiu sira atu fó apoiu ba família vulneravel sira ne’ebé mak presiza”, Agapito Cardoso reitera iha Suai Loro, ohin.
Sentru Solidariedade Covalima simu, iha janeiru, foos husi Ministériu Solidariedade Sosiál no Inkluzaun hamutuk saku 2.400, husi númeru ne’e sentru fó ona balun ba instituisaun Solidariedade Sosiál hanesan Uma Mahon Salele saku 150, Koléjiu Canossian Suai 45, orfonatu Maucatar 45, asrama Mãe Misericórdia 45, estasaun Misionáriu São José Maucatar 10, Koléjiu Canossiana Fohorem 10, Parókia Santo António Salele 10 no ba ema ho defisiénsia sira.
Daudaun foos iha armazein Suai hela saku 2.001. Aleinde ne’e, iha mós suprimentu ai-han sira seluk hanesan supermie, sardina, susu-been no seluk.
Diretór Klibur Dezenvolvimentu Sustentavel Timor-oan (KDESTO), Alfredo dos Santos, reforsa katak durante ne’e organizasaun hato’o proposta ba sentru hodi husu apoiu foos atu distribui ba maluk difisiénsia sira ne’ebé mak presiza tulun.
Tuir dadus 2024, KDESTO fó apoiu foos ba maluk difisiénsia 36 iha postu Zumalai, iha suku, 56 iha postu Suai, suku Beco no ualu iha postu Tilomar, iha suku Beiseuk no Lalawa.
Notísia relevante: Ema ho defisiénsia 36 iha suku Lour hetan apoiu foos husi SSSI
Jornalista: Celestina Teles
Editora: Maria Auxiliadora
