Estudante sira vizita AMRT hodi hamoris nasionalizmu
DILI, 20 fevereiru 2024 (TATOLI)—Estudante 47 hamutuk ho manorin sira hosi Eskola Internasionál Kameli Timor, tersa ne’e, hala’o vizita ba Arkivu Muzeu Rezisténsia Timorense, Institutu Públiku (AMRT, I.P) hodi hatene istória Timor.
Diretora Eskola Internasionál Kameli Timor, Rini Fatmawati Alves Cruz, hateten, razaun parte eskola lori estudante sira vizita muzeu tanba konsidera programa ne’e importante hodi bele hatene istória nasaun tanba iha eskola manorin hanorin no estudante sira rona de’it istória, maibé mai iha mezeu bele haree direitamente istória sira.
“Ita lori estudante sira mai vizita muzeu hanesan parte ida hamoris labarik sira-nia nasionalizmu atu hatene istória luta ba independénsia, nune’e labarik sira boot mai bele brani tuir eroi no eroina sira ne’ebé mate ona hodi kontinua luta ba dezenvolvimentu nasaun,” Diretora eskola informa ba Agência Tatoli, iha AMRT, tersa ne’e.
Notísia relevante : AMRT rekolla dokumentu rezisténsia iha Oé-Cusse hodi konserva ba futuru jerasaun
Razaun seluk lori sai estudante sira bá vizita fatin istóriku sira hodi hasoru ema barak no muda estudante ninia mentalidade.
“Estudante sira labele aprende de’it teoria maibé prátika mós, signifika prátika mai iha muzeu hanesan referénsia orijinál tanba hetan esplikasaun direita hosi tékniku sira iha muzeu, ne’ebé sei muda labarik sira-nia mentalidade no halo sira hatene liután istória nasaun hodi sai referénsia,” nia akresenta.
Iha fatin hanesan, Tékniku Diresaun Nasionál Edukativa Kultura iha AMRT, I.P, Crigénio Alarico Marques, agradese tebes ba parte eskola no estudante tanba bele mai haree direita istória luta ba ukun-an.
“Ha’u mak ohin akompaña estudante sira, ha’u esplika istória Timor hahú hosi tempu kolónia portugés to’o invazasaun Indonézia inklui to’o ita deside ukun rasik-an,” nia tenik.
Tuir Crigénio Alarico, esplikasaun sira importante ba estudante sira tanba sira maioria bainhira kiik seidauk hatene prosesu luta Timor ba ukun rasik-an.
Estudante Michaella Maia Soares, sente kontente tebes tanba antes ne’e nia la hatene Muzeu Resisténsia maibé hafoin vizita nia bele hatene fatin muzeu ne’e rasik no hatene liután istória funu nian.
Jornalista : Arminda Fonseca
Editora : Julia Chatarina
