OÉ-CUSSE, 25 outubru 2023 (TATOLI – Prezerva no konserva istória ba futuru jerasaun foun, ekipa hosi Arkivu Múzeu Rezisténsia Timor-Leste Institutu Públiku (AMRT,IP), hala’o atividade rekolla dokumentu rezisténsia nian hahú hosi 1975 to’o 1999, iha Oé-Cusse.
Diretór Nasionál Audiovizuál AMRT, IP, Tadeu Amaral Sarmento, hateten, atividade ne’ebé hala’o iha Oé-Cusse, hanesan etapa dahuluk, ho objetivu atu rekolla no verifika dokumentu sira-ne’eb’e uza iha tempu funu, atu prezerva sai istória ba futuru jerasaun.
“AMRT, hanesan Instituisaun Públiku, iha Prezidente Konsellu Ministru nia okos, ho misaun, viZaun maka oinsÁ rekolla prezerva no divulga informasaun rezisténsia nian ba ita no mós ba estudante sira iha loron aban nian,” Tadeu Amaral SarmentO, ko’alia iha Oé-Cusse, kuarta ne’e.
Ezekutivu ne’e informa, ekipa ne’ebé hala’o servisu iha Oé-Cusse, durante semana ida mai hosi iha diresaun tolu, maka hanesan diresaun edukativa hodi realiza semináriu ne’ebé hala’o iha sábadu liubá iha otél Ambeno.
Diresaun Muzeolojia, durante ne’e rekolla dokumentu rezisténsia nian iha kaixa hotu-hotu la’ós dokumentu de’it maibé iha futuru karik iha objetu ne’ebé maka iha bele entrega ba Arkivu Múzeu Rezisténsia Timor-Leste.
“Ida-ne’e ita-bele prezerva didi’ak tanba saida? ba futuru ita-nia bei-oan no oan sira, karik bele asesu no haree, tantu fotografia, karta korenspondénsia ho apelu oan ki’ak sira-ne’e,” nia afirma.
Diresaun Audiovizuál, durante ne’e hala’o entervista ba veteranu sira, sobrevivente sira iha Masakre Tumin, atu bele prezerva didi’ak, nune’e ita-nia oan sira, iha tempu ruma hala’o vizita ba múzeu hakarak atu lee no rona istória sira-ne’ebé prezerva.
Prezidente Konsellu Veteranu Oé-Cusse, Venancio Lafo, agradese ba prezensa ekipa hosi AMRT iha Oé-Cusse, nune’e halibur faktu no sasin sira kona-bá akontesimentu luta pasadu nian hahú hosi 1975 to’o 1999.
“Ita agradese tanba primeira-vés hala’o atividade ida-ne’e ba to’o suku no aldeia sira iha territóriu Oé-Cusse, tanba antes ne’e kontaktu ita, autoridade RAEOA, hodi hala’o atividade ida-ne’e hahú iha loron 21 hala’o semináriu hodi komemora akontesimentu Masakre Santa-Crus no komemora entrada INTERFET tuun to’o Oé-Cusse,” nia orgullu.
Notísia relevante: Kaixa klandestina ualu iha Oé-Cusse entrega dokumentu rezisténsia ba AMRT, IP
Jornalista: Abílio Elo Nini
Editór: Rafael Ximenes de A. Belo
