OEKUSI, 07 Maiu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), propoin ona verba rihun $31,700.00, aloka husi Orsamentu Jerál Estadu (OJE) 2026 hodi utiliza ba selebrasaun Loron Restaurasaun Independénsia 20 Maiu dala 24 hala’o iha Oekusi.
Notísia relevante:RAEOA sei komemora 20 Maiu iha Pante Makasar, desportu adia ba Novembru
Prezidente Komisaun Organizadora, Salvador da Cruz, informa, iha ámbitu enkontru daruak ho seksaun sira iha salaun administrasaun Numbei, kuarta lorokraik ne’e, diskute kona-ba proposta orsamentu ba seksaun sira halo hodi ajustamentu ba kabementesaun.
“Orsamentu ba 20 Maiu, ami propoin ona rihun $31,700.00,” nia informa ba jornalista sira.
Atuál Sekretáriu Rejionál Administrasaun no Asuntu Finansa ne’e, esplika, verba ida-ne’e sei liuhusi prosesu adiantamentu. Katak, ita foti entrega ba seksaun sira, la inklui konsumu ka hahán ou bebidás.
Maibé, nia dehan, verba ne’e ba dekorasaun no atividade desportu komunitária, maka hanesan sa’e buah, tata berlindus, dada-tali, jinastika, marka-pasu ba estuante sira inklui transporte mobilizasaun masa husi suku 20.
Notísia relevante:Governu aprova tema ba selebrasaun Restaurasaun Independénsia RDTL ba da-24
Kona-ba bainaka, nia afirma katak, daudaun ne’e Autoridade RAEOA seidauk iha informasaun, maibé sertamente kada tinan iha selebrasaun loron boot sira, membru Governu sira sei tuun ba munisípiu hodi festeza hamutuk ho komunidade sira.
“Maibé kona-ba tema, ita simu ona husi Goverenu Sentrál maka, ‘Hamutuk ita sei hari’i pátria ida-ne’ebé justa, inkluziva no reziliente liután’,” nia hateten.
Jornalista: Abílio Elo Nini
Editór: Rafael Ximenes de A. Belo
